دھوپ نے گزارش کی

ایک بوند بارش کی

روز اچھے نہیں لگتے آنسو

خاص موقعوں پہ مزا دیتے ہیں

آج پھر مجھ سے کہا دریا نے

کیا ارادہ ہے بہا لے جاؤں

اندھیرا ہے کیسے ترا خط پڑھوں

لفافے میں کچھ روشنی بھیج دے

اب تو چپ چاپ شام آتی ہے

پہلے چڑیوں کے شور ہوتے تھے

سردی میں دن سرد ملا

ہر موسم بے درد ملا

کچھ تو اس دل کو سزا دی جائے

اس کی تصویر ہٹا دی جائے

کبھی آنکھیں کتاب میں گم ہیں

کبھی گم ہے کتاب آنکھوں میں

اپنا گھر آنے سے پہلے

اتنی گلیاں کیوں آتی ہیں

مانا کہ تو ذہین بھی ہے خوب رو بھی ہے

تجھ سا نہ میں ہوا تو بھلا کیا برا ہوا

اچھے دن کب آئیں گے

کیا یوں ہی مر جائیں گے

آگ اپنے ہی لگا سکتے ہیں

غیر تو صرف ہوا دیتے ہیں

اس سے ملے زمانہ ہوا لیکن آج بھی

دل سے دعا نکلتی ہے خوش ہو جہاں بھی ہو

میں خود کو مرتے ہوئے دیکھ کر بہت خوش ہوں

یہ ڈر بھی ہے کہ مری آنکھ کھل نہ جائے کہیں

اس سے بچھڑتے وقت میں رویا تھا خوب سا

یہ بات یاد آئی تو پہروں ہنسا کیا

ہائے وہ لوگ جو دیکھے بھی نہیں

یاد آئیں تو رلا دیتے ہیں

نظروں سے ناپتا ہے سمندر کی وسعتیں

ساحل پہ اک شخص اکیلا کھڑا ہوا

دیکھا نہ ہوگا تو نے مگر انتظار میں

چلتے ہوئے سمے کو ٹھہرتے ہوئے بھی دیکھ

موت بھی دور بہت دور کہیں پھرتی ہے

کون اب آ کے اسیروں کو رہائی دے گا

دیکھا تو سب کے سر پہ گناہوں کا بوجھ تھا

خوش تھے تمام نیکیاں دریا میں ڈال کر

میں اس کے بدن کی مقدس کتاب

نہایت عقیدت سے پڑھتا رہا

اب نہ غالبؔ سے شکایت ہے نہ شکوہ میرؔ کا

بن گیا میں بھی نشانہ ریختہ کے تیر کا

کمرے میں مزے کی روشنی ہو

اچھی سی کوئی کتاب دیکھوں

رکھتے ہو اگر آنکھ تو باہر سے نہ دیکھو

دیکھو مجھے اندر سے بہت ٹوٹ چکا ہوں

نیا سال دیوار پر ٹانگ دے

پرانے برس کا کلنڈر گرا

وہ جنگلوں میں درختوں پہ کودتے پھرنا

برا بہت تھا مگر آج سے تو بہتر تھا

چھوڑ گیا مجھ کو علویؔ

شاید وہ جلدی میں تھا

ان دنوں گھر سے عجب رشتہ تھا

سارے دروازے گلے لگتے تھے

ابھی دو چار ہی بوندیں گریں ہیں

مگر موسم نشیلا ہو گیا ہے

گھر میں کیا آیا کہ مجھ کو

دیواروں نے گھیر لیا ہے

غم بہت دن مفت کی کھاتا رہا

اب اسے دل سے نکالا چاہیئے

اور بازار سے کیا لے جاؤں

پہلی بارش کا مزا لے جاؤں

اک لڑکا تھا اک لڑکی تھی

آگے اللہ کی مرضی تھی

رات پڑے گھر جانا ہے

صبح تلک مر جانا ہے

تھوڑی سردی ذرا سا نزلہ ہے

شاعری کا مزاج پتلا ہے

چلا جاؤں گا جیسے خود کو تنہا چھوڑ کر علویؔ

میں اپنے آپ کو راتوں میں اٹھ کر دیکھ لیتا ہوں

ارے یہ دل اور اتنا خالی

کوئی مصیبت ہی پال رکھیے

رات ملی تنہائی ملی اور جام ملا

گھر سے نکلے تو کیا کیا آرام ملا

ایسا ہنگامہ نہ تھا جنگل میں

شہر میں آئے تو ڈر لگتا تھا

کھڑکیوں سے جھانکتی ہے روشنی

بتیاں جلتی ہیں گھر گھر رات میں

آنکھیں کھولو خواب سمیٹو جاگو بھی

علویؔ پیارے دیکھو سالا دن نکلا

گاڑی آتی ہے لیکن آتی ہی نہیں

ریل کی پٹری دیکھ کے تھک جاتا ہوں میں

ہر وقت کھلتے پھول کی جانب تکا نہ کر

مرجھا کے پتیوں کو بکھرتے ہوئے بھی دیکھ

بلا رہا تھا کوئی چیخ چیخ کر مجھ کو

کنویں میں جھانک کے دیکھا تو میں ہی اندر تھا

موت نہ آئی تو علویؔ

چھٹی میں گھر جائیں گے

تعریف سن کے دوست سے علویؔ تو خوش نہ ہو

اس کو تری برائیاں کرتے ہوئے بھی دیکھ

پرندے دور فضاؤں میں کھو گئے علویؔ

اجاڑ اجاڑ درختوں پہ آشیانے تھے

آسمان پر جا پہنچوں

اللہ تیرا نام لکھوں

دروازے پر پہرہ دینے

تنہائی کا بھوت کھڑا ہے

بچھڑتے وقت ایسا بھی ہوا ہے

کسی کی سسکیاں اچھی لگی ہیں