تصویر پر اشعار

تیری صورت سے کسی کی نہیں ملتی صورت

ہم جہاں میں تری تصویر لیے پھرتے ہیں

آپ نے تصویر بھیجی میں نے دیکھی غور سے

ہر ادا اچھی خموشی کی ادا اچھی نہیں

زندگی بھر کے لیے روٹھ کے جانے والے

میں ابھی تک تری تصویر لیے بیٹھا ہوں

رنگ خوشبو اور موسم کا بہانا ہو گیا

اپنی ہی تصویر میں چہرہ پرانا ہو گیا

چپ چاپ سنتی رہتی ہے پہروں شب فراق

تصویر یار کو ہے مری گفتگو پسند

اپنے جیسی کوئی تصویر بنانی تھی مجھے

مرے اندر سے سبھی رنگ تمہارے نکلے

جو چپ چاپ رہتی تھی دیوار پر

وہ تصویر باتیں بنانے لگی

مجھ کو اکثر اداس کرتی ہے

ایک تصویر مسکراتی ہوئی

ایک کمی تھی تاج محل میں

میں نے تری تصویر لگا دی

بھیج دی تصویر اپنی ان کو یہ لکھ کر شکیلؔ

آپ کی مرضی ہے چاہے جس نظر سے دیکھیے

اپنی تصویر بناؤ گے تو ہوگا احساس

کتنا دشوار ہے خود کو کوئی چہرہ دینا

کچھ تو اس دل کو سزا دی جائے

اس کی تصویر ہٹا دی جائے

اک بار تجھے عقل نے چاہا تھا بھلانا

سو بار جنوں نے تری تصویر دکھا دی

میں نے تو یونہی راکھ میں پھیری تھیں انگلیاں

دیکھا جو غور سے تری تصویر بن گئی

جس سے یہ طبیعت بڑی مشکل سے لگی تھی

دیکھا تو وہ تصویر ہر اک دل سے لگی تھی

مدتوں بعد اٹھائے تھے پرانے کاغذ

ساتھ تیرے مری تصویر نکل آئی ہے

سوچتا ہوں تری تصویر دکھا دوں اس کو

روشنی نے کبھی سایہ نہیں دیکھا اپنا

رنگ درکار تھے ہم کو تری خاموشی کے

ایک آواز کی تصویر بنانی تھی ہمیں

رفتہ رفتہ سب تصویریں دھندلی ہونے لگتی ہیں

کتنے چہرے ایک پرانے البم میں مر جاتے ہیں

میں لاکھ اسے تازہ رکھوں دل کے لہو سے

لیکن تری تصویر خیالی ہی رہے گی

اک محبت کی یہ تصویر ہے دو رنگوں میں

شوق سب میرا ہے اور ساری حیا اس کی ہے

خامشی تیری مری جان لیے لیتی ہے

اپنی تصویر سے باہر تجھے آنا ہوگا

دل کے آئینے میں ہے تصویر یار

جب ذرا گردن جھکائی دیکھ لی

دلی کے نہ تھے کوچے اوراق مصور تھے

جو شکل نظر آئی تصویر نظر آئی

چاہیئے اس کا تصور ہی سے نقشہ کھینچنا

دیکھ کر تصویر کو تصویر پھر کھینچی تو کیا

میں نے بھی دیکھنے کی حد کر دی

وہ بھی تصویر سے نکل آیا

کوئی تصویر مکمل نہیں ہونے پاتی

دھوپ دیتے ہیں تو سایا نہیں رہنے دیتے

آ کہ میں دیکھ لوں کھویا ہوا چہرہ اپنا

مجھ سے چھپ کر مری تصویر بنانے والے

ہم ہیں اس کے خیال کی تصویر

جس کی تصویر ہے خیال اپنا

کہہ رہی ہے یہ تری تصویر بھی

میں کسی سے بولنے والی نہیں

لگتا ہے کئی راتوں کا جاگا تھا مصور

تصویر کی آنکھوں سے تھکن جھانک رہی ہے

آتا تھا جس کو دیکھ کے تصویر کا خیال

اب تو وہ کیل بھی مری دیوار میں نہیں

صورت چھپائیے کسی صورت پرست سے

ہم دل میں نقش آپ کی تصویر کر چکے

تصویر کے دو رخ ہیں جاں اور غم جاناں

اک نقش چھپانا ہے اک نقش دکھانا ہے

حرف کو لفظ نہ کر لفظ کو اظہار نہ دے

کوئی تصویر مکمل نہ بنا اس کے لیے

مجھے یہ زعم کہ میں حسن کا مصور ہوں

انہیں یہ ناز کہ تصویر تو ہماری ہے

وہ عیادت کو تو آیا تھا مگر جاتے ہوئے

اپنی تصویریں بھی کمرے سے اٹھا کر لے گیا

صورت وصل نکلتی کسی تدبیر کے ساتھ

میری تصویر ہی کھنچتی تری تصویر کے ساتھ

کل تیری تصویر مکمل کی میں نے

فوراً اس پر تتلی آ کر بیٹھ گئی

پیار گیا تو کیسے ملتے رنگ سے رنگ اور خواب سے خواب

ایک مکمل گھر کے اندر ہر تصویر ادھوری تھی

تری تصویر تو وعدے کے دن کھنچنے کے قابل ہے

کہ شرمائی ہوئی آنکھیں ہیں گھبرایا ہوا دل ہے

خوشبو گرفت عکس میں لایا اور اس کے بعد

میں دیکھتا رہا تری تصویر تھک گئی

الماری میں تصویریں رکھتا ہوں

اب بچپن اور بڑھاپا ایک ہوئے

روز ہے درد محبت کا نرالا انداز

روز دل میں تری تصویر بدل جاتی ہے

تاب نظارہ نہیں آئنہ کیا دیکھنے دوں

اور بن جائیں گے تصویر جو حیراں ہوں گے

کہیں ایسا نہ ہو کم بخت میں جان آ جائے

اس لیے ہاتھ میں لیتے مری تصویر نہیں

شہر ہو دشت تمنا ہو کہ دریا کا سفر

تیری تصویر کو سینے سے لگا رکھا ہے

گرما سکیں نہ چاہتیں تیرا کٹھور جسم

ہر اک جل کے بجھ گئی تصویر سنگ میں

دیکھنا پڑتی ہے خود ہی عکس کی صورت گری

آئنہ کیسے بتائے آئنے میں کون ہے

اٹھاؤ کیمرا تصویر کھینچ لو ان کی

اداس لوگ کہاں روز مسکراتے ہیں