گھر سے نکل کر جاتا ہوں میں روز کہاں

اک دن اپنا پیچھا کر کے دیکھا جائے

ایک جیسے لگ رہے ہیں اب سبھی چہرے مجھے

ہوش کی یہ انتہا ہے یا بہت نشے میں ہوں

ہر طرف تھی خاموشی اور ایسی خاموشی

رات اپنے سائے سے ہم بھی ڈر کے روئے تھے

بس ذرا اک آئنے کے ٹوٹنے کی دیر تھی

اور میں باہر سے اندر کی طرح لگنے لگا

خاموشی میں چاہے جتنا بیگانہ پن ہو

لیکن اک آہٹ جانی پہچانی ہوتی ہے

سبب خاموشیوں کا میں نہیں تھا

مرے گھر میں سبھی کم بولتے تھے

یاد بھی آتا نہیں کچھ بھولتا بھی کچھ نہیں

یا بہت مصروف ہوں میں یا بہت فرصت میں ہوں

کتنا آسان تھا بچپن میں سلانا ہم کو

نیند آ جاتی تھی پریوں کی کہانی سن کر

اس طرح تو اور بھی دیوانگی بڑھ جائے گی

پاگلوں کو پاگلوں سے دور رہنا چاہئے

جانے کتنے لوگ شامل تھے مری تخلیق میں

میں تو بس الفاظ میں تھا شاعری میں کون تھا

ہماری بات کسی کی سمجھ میں کیوں آتی

خود اپنی بات کو کتنا سمجھ رہے ہیں ہم

اس کو بھی میری طرح اپنی وفا پر تھا یقیں

وہ بھی شاید اسی دھوکے میں ملا تھا مجھ کو

ہر گھڑی تیرا تصور ہر نفس تیرا خیال

اس طرح تو اور بھی تیری کمی بڑھ جائے گی

ہم کافروں نے شوق میں روزہ تو رکھ لیا

اب حوصلہ بڑھانے کو افطار بھی تو ہو

ہمارے حال پہ اب چھوڑ دے ہمیں دنیا

یہ بار بار ہمیں کیوں بتانا پڑتا ہے

تو ہمیشہ مانگتا رہتا ہے کیوں غم سے نجات

غم نہیں ہوں گے تو کیا تیری خوشی بڑھ جائے گی

اب تو اتنی بار ہم رستے میں ٹھوکر کھا چکے

اب تو ہم کو بھی وہ پتھر دیکھ لینا چاہئے

اتنا تو سمجھتے تھے ہم بھی اس کی مجبوری

انتظار تھا لیکن در کھلا نہیں رکھا

میں اپنے لفظ یوں باتوں میں ضائع کر نہیں سکتا

مجھے جو کچھ بھی کہنا ہے اسے شعروں میں کہتا ہوں

یہ سورج کب نکلتا ہے انہیں سے پوچھنا ہوگا

سحر ہونے سے پہلے ہی جو بستر چھوڑ دیتے ہیں

میں اب جو ہر کسی سے اجنبی سا پیش آتا ہوں

مجھے اپنے سے یہ وابستگی مجبور کرتی ہے

شاید بتا دیا تھا کسی نے مرا پتہ

میلوں مری تلاش میں رستہ نکل گیا

کچھ خبروں سے اتنی وحشت ہوتی ہے

ہاتھوں سے اخبار الجھنے لگتے ہیں

اتنی سی بات رات پتہ بھی نہیں لگی

کب بجھ گئے چراغ ہوا بھی نہیں لگی

ہم وہ صحرا کے مسافر ہیں ابھی تک جن کی

پیاس بجھتی ہے سرابوں کی کہانی سن کر

آنکھوں میں ایک بار ابھرنے کی دیر تھی

پھر آنسوؤں نے آپ ہی رستے بنا لیے

یہ سب تو دنیا میں ہوتا رہتا ہے

ہم خود سے بیکار الجھنے لگتے ہیں

یہ کیا کہ روز پہنچ جاتا ہوں میں گھر اپنے

اب اپنی جیب میں اپنا پتہ نہ رکھا جائے

اسے اک بت کے آگے سر جھکاتے سب نے دیکھا ہے

وہ کافر ہی سہی پکا مگر ایمان رکھتا ہے

میں تھوڑی دیر بھی آنکھوں کو اپنی بند کر لوں تو

اندھیروں میں مجھے اک روشنی محسوس ہوتی ہے

کہیں جیسے میں کوئی چیز رکھ کر بھول جاتا ہوں

پہن لیتا ہوں جب دستار تو سر بھول جاتا ہوں

یہ کیا کہ روز ابھرتے ہو روز ڈوبتے ہو

تم ایک بار میں غرقاب کیوں نہیں ہوتے

امیدوں سے پردہ رکھا خوشیوں سے محروم رہیں

خواب مرا تو چالس دن تک سوگ منایا آنکھوں نے

دامن کے چاک سینے کو بیٹھے ہیں جب بھی ہم

کیوں بار بار سوئی سے دھاگا نکل گیا

ورنہ تو ہم منظر اور پس منظر میں الجھے رہتے

ہم نے بھی سچ مان لیا جو کچھ دکھلایا آنکھوں نے

سورج سے اس کا نام و نسب پوچھتا تھا میں

اترا نہیں ہے رات کا نشہ ابھی تلک

ہم سرابوں میں ہوئے داخل تو یہ ہم پر کھلا

تشنگی سب میں تھی لیکن تشنگی میں کون تھا

میں نے مانا ایک گہر ہوں پھر بھی صدف میں ہوں

مجھ کو آخر یوں ہی گھٹ کر کب تک رہنا ہے