ghar se nikal kar jaatā huuñ maiñ roz kahāñ

ik din apnā pīchhā kar ke dekhā jaa.e

ghar se nikal kar jata hun main roz kahan

ek din apna pichha kar ke dekha jae

ek jaise lag rahe haiñ ab sabhī chehre mujhe

hosh kī ye intihā hai yā bahut nashshe meñ huuñ

ek jaise lag rahe hain ab sabhi chehre mujhe

hosh ki ye intiha hai ya bahut nashshe mein hun

har taraf thī ḳhāmoshī aur aisī ḳhāmoshī

raat apne saa.e se ham bhī Dar ke ro.e the

har taraf thi KHamoshi aur aisi KHamoshi

raat apne sae se hum bhi Dar ke roe the

bas zarā ik aa.ine ke TūTne kī der thī

aur maiñ bāhar se andar kī tarah lagne lagā

bas zara ek aaine ke TuTne ki der thi

aur main bahar se andar ki tarah lagne laga

ḳhāmoshī meñ chāhe jitnā begāna-pan ho

lekin ik aahaT jānī-pahchānī hotī hai

KHamoshi mein chahe jitna begana-pan ho

lekin ek aahaT jaani-pahchani hoti hai

sabab ḳhāmoshiyoñ kā maiñ nahīñ thā

mire ghar meñ sabhī kam bolte the

sabab KHamoshiyon ka main nahin tha

mere ghar mein sabhi kam bolte the

yaad bhī aatā nahīñ kuchh bhūltā bhī kuchh nahīñ

yā bahut masrūf huuñ maiñ yā bahut fursat meñ huuñ

yaad bhi aata nahin kuchh bhulta bhi kuchh nahin

ya bahut masruf hun main ya bahut fursat mein hun

kitnā āsān thā bachpan meñ sulānā ham ko

niiñd aa jaatī thī pariyoñ kī kahānī sun kar

kitna aasan tha bachpan mein sulana hum ko

nind aa jati thi pariyon ki kahani sun kar

is tarah to aur bhī dīvāngī baḌh jā.egī

pāgaloñ ko pāgaloñ se duur rahnā chāhiye

is tarah to aur bhi diwangi baDh jaegi

pagalon ko pagalon se dur rahna chahiye

jaane kitne log shāmil the mirī taḳhlīq meñ

maiñ to bas alfāz meñ thā shā.erī meñ kaun thā

jaane kitne log shamil the meri taKHliq mein

main to bas alfaz mein tha shaeri mein kaun tha

hamārī baat kisī kī samajh meñ kyuuñ aatī

ḳhud apnī baat ko kitnā samajh rahe haiñ ham

hamari baat kisi ki samajh mein kyun aati

KHud apni baat ko kitna samajh rahe hain hum

us ko bhī merī tarah apnī vafā par thā yaqīñ

vo bhī shāyad isī dhoke meñ milā thā mujh ko

us ko bhi meri tarah apni wafa par tha yaqin

wo bhi shayad isi dhoke mein mila tha mujh ko

har ghaḌī terā tasavvur har nafas terā ḳhayāl

is tarah to aur bhī terī kamī baḌh jā.egī

har ghaDi tera tasawwur har nafas tera KHayal

is tarah to aur bhi teri kami baDh jaegi

ham kāfiroñ ne shauq meñ roza to rakh liyā

ab hausla baḌhāne ko iftār bhī to ho

hum kafiron ne shauq mein roza to rakh liya

ab hausla baDhane ko iftar bhi to ho

hamāre haal pe ab chhoḌ de hameñ duniyā

ye baar baar hameñ kyuuñ batānā paḌtā hai

hamare haal pe ab chhoD de hamein duniya

ye bar bar hamein kyun batana paDta hai

tū hamesha māñgtā rahtā hai kyuuñ ġham se najāt

ġham nahīñ hoñge to kyā terī ḳhushī baḌh jā.egī

tu hamesha mangta rahta hai kyun gham se najat

gham nahin honge to kya teri KHushi baDh jaegi

ab to itnī baar ham raste meñ Thokar khā chuke

ab to ham ko bhī vo patthar dekh lenā chāhiye

ab to itni bar hum raste mein Thokar kha chuke

ab to hum ko bhi wo patthar dekh lena chahiye

itnā to samajhte the ham bhī us kī majbūrī

intizār thā lekin dar khulā nahīñ rakkhā

itna to samajhte the hum bhi us ki majburi

intizar tha lekin dar khula nahin rakkha

maiñ apne lafz yuuñ bātoñ meñ zaa.e kar nahīñ saktā

mujhe jo kuchh bhī kahnā hai use sheroñ meñ kahtā huuñ

main apne lafz yun baaton mein zae kar nahin sakta

mujhe jo kuchh bhi kahna hai use sheron mein kahta hun

ye sūraj kab nikaltā hai unhīñ se pūchhnā hogā

sahar hone se pahle hī jo bistar chhoḌ dete haiñ

ye suraj kab nikalta hai unhin se puchhna hoga

sahar hone se pahle hi jo bistar chhoD dete hain

maiñ ab jo har kisī se ajnabī sā pesh aatā huuñ

mujhe apne se ye vābastagī majbūr kartī hai

main ab jo har kisi se ajnabi sa pesh aata hun

mujhe apne se ye wabastagi majbur karti hai

shāyad batā diyā thā kisī ne mirā pata

mīloñ mirī talāsh meñ rasta nikal gayā

shayad bata diya tha kisi ne mera pata

milon meri talash mein rasta nikal gaya

kuchh ḳhabroñ se itnī vahshat hotī hai

hāthoñ se aḳhbār ulajhne lagte haiñ

kuchh KHabron se itni wahshat hoti hai

hathon se aKHbar ulajhne lagte hain

ham vo sahrā ke musāfir haiñ abhī tak jin kī

pyaas bujhtī hai sarāboñ kī kahānī sun kar

hum wo sahra ke musafir hain abhi tak jin ki

pyas bujhti hai sarabon ki kahani sun kar

itnī sī baat raat pata bhī nahīñ lagī

kab bujh ga.e charāġh havā bhī nahīñ lagī

itni si baat raat pata bhi nahin lagi

kab bujh gae charagh hawa bhi nahin lagi

āñkhoñ meñ ek baar ubharne kī der thī

phir āñsuoñ ne aap hī raste banā liye

aankhon mein ek bar ubharne ki der thi

phir aansuon ne aap hi raste bana liye

ye sab to duniyā meñ hotā rahtā hai

ham ḳhud se be-kār ulajhne lagte haiñ

ye sab to duniya mein hota rahta hai

hum KHud se be-kar ulajhne lagte hain

ye kyā ki roz pahuñch jaatā huuñ maiñ ghar apne

ab apnī jeb meñ apnā pata na rakkhā jaa.e

ye kya ki roz pahunch jata hun main ghar apne

ab apni jeb mein apna pata na rakkha jae

use ik but ke aage sar jhukāte sab ne dekhā hai

vo kāfir hī sahī pakkā magar īmān rakhtā hai

use ek but ke aage sar jhukate sab ne dekha hai

wo kafir hi sahi pakka magar iman rakhta hai

maiñ thoḌī der bhī āñkhoñ ko apnī band kar luuñ to

añdheroñ meñ mujhe ik raushnī mahsūs hotī hai

main thoDi der bhi aankhon ko apni band kar lun to

andheron mein mujhe ek raushni mahsus hoti hai

kahīñ jaise maiñ koī chiiz rakh kar bhuul jaatā huuñ

pahan letā huuñ jab dastār to sar bhuul jaatā huuñ

kahin jaise main koi chiz rakh kar bhul jata hun

pahan leta hun jab dastar to sar bhul jata hun

ye kyā ki roz ubharte ho roz Dūbte ho

tum ek baar meñ ġharqāb kyuuñ nahīñ hote

ye kya ki roz ubharte ho roz Dubte ho

tum ek bar mein gharqab kyun nahin hote

ummīdoñ se parda rakkhā ḳhushiyoñ se mahrūm rahīñ

ḳhvāb marā to chālis din tak sog manāyā āñkhoñ ne

ummidon se parda rakkha KHushiyon se mahrum rahin

KHwab mara to chaalis din tak sog manaya aankhon ne

dāman ke chaak siine ko baiThe haiñ jab bhī ham

kyuuñ baar baar suuī se dhāgā nikal gayā

daman ke chaak sine ko baiThe hain jab bhi hum

kyun bar bar sui se dhaga nikal gaya

varna to ham manzar aur pas-manzar meñ uljhe rahte

ham ne bhī sach maan liyā jo kuchh dikhlāyā āñkhoñ ne

warna to hum manzar aur pas-manzar mein uljhe rahte

hum ne bhi sach man liya jo kuchh dikhlaya aankhon ne

sūraj se us kā nām-o-nasab pūchhtā thā maiñ

utrā nahīñ hai raat kā nashsha abhī talak

suraj se us ka nam-o-nasab puchhta tha main

utra nahin hai raat ka nashsha abhi talak

ham sarāboñ meñ hue dāḳhil to ye ham par khulā

tishnagī sab meñ thī lekin tishnagī meñ kaun thā

hum sarabon mein hue daKHil to ye hum par khula

tishnagi sab mein thi lekin tishnagi mein kaun tha

maiñ ne maanā ek guhar huuñ phir bhī sadaf meñ huuñ

mujh ko āḳhir yuuñ hī ghuT kar kab tak rahnā hai

main ne mana ek guhar hun phir bhi sadaf mein hun

mujh ko aaKHir yun hi ghuT kar kab tak rahna hai