زنداں پر اشعار

زندگی جبر ہے اور جبر کے آثار نہیں

ہائے اس قید کو زنجیر بھی درکار نہیں

جیل سے واپس آ کر اس نے پانچوں وقت نماز پڑھی

منہ بھی بند ہوئے سب کے اور بدنامی بھی ختم ہوئی

ذرا سا شور بغاوت اٹھا اور اس کے بعد

وزیر تخت پہ بیٹھے تھے اور جیل میں ہم

اب اس غریب چور کو بھیجو گے جیل کیوں

غربت کی جس نے کاٹ لی پاداش جیب میں

لہو سے میں نے لکھا تھا جو کچھ دیوار زنداں پر

وہ بجلی بن کے چمکا دامن صبح گلستاں پر

نہ کسی آہ کی آواز نہ زنجیر کا شور

آج کیا ہو گیا زنداں میں کہ زنداں چپ ہے

قفس سے دور سہی موسم بہار تو ہے

اسیرو آؤ ذرا ذکر آشیاں ہو جائے

دیوار زنداں کے پیچھے

جرم محبت میں بیٹھا ہوں

جانے کتنے بے قصوروں کو سزائیں مل رہیں

جھوٹ لگتا ہے تمہیں تو جیل جا کر دیکھیے

ہم وحشیوں کا مسکن کیا پوچھتا ہے ظالم

صحرا ہے تو صحرا ہے زنداں ہے تو زنداں ہے

میں سنتری ہوں عورتوں کی جیل کا حضور

دو چار قیدی اس لیے کم گن رہا ہوں میں

کن شہیدوں کے لہو کے یہ فروزاں ہیں چراغ

روشنی سی جو ہے زنداں کے ہر اک روزن میں

جو قیدئ محن تھے جمیلہؔ وہ چل بسے

زنداں میں کوئی صاحب زنداں نہیں رہا

پتھر تانے لوگ کھڑے ہیں

زنداں کی دیوار کے پیچھے

زنداں سے نکلنے کی یہ تدبیر غلط ہے

زنجیر کے ٹکڑے کرو دیوار گرا دو

زنداں کی تو اپنے سیر تو کر

شاید کوئی بے گناہ نکلے

ہائے زنجیر شکن وہ کشش فصل بہار

اور زنداں سے نکلنا ترے دیوانے کا