Sher on Zindan

zindagī jabr hai aur jabr ke āsār nahīñ

haa.e is qaid ko zanjīr bhī darkār nahīñ

zindagi jabr hai aur jabr ke aasar nahin

hae is qaid ko zanjir bhi darkar nahin

jail se vāpas aa kar us ne pān.cho vaqt namāz paḌhī

muñh bhī band hue sab ke aur badnāmī bhī ḳhatm huī

jail se wapas aa kar us ne pancho waqt namaz paDhi

munh bhi band hue sab ke aur badnami bhi KHatm hui

zarā sā shor-e-baġhāvat uThā aur us ke ba.ad

vazīr taḳht pe baiThe the aur jail meñ ham

zara sa shor-e-baghawat uTha aur us ke baad

wazir taKHt pe baiThe the aur jail mein hum

ab us ġharīb chor ko bhejoge jail kyuuñ

ġhurbat kī jis ne kaaT lī pādāsh jeb meñ

ab us gharib chor ko bhejoge jail kyun

ghurbat ki jis ne kaT li padash jeb mein

lahū se maiñ ne likhā thā jo kuchh dīvār-e-zindāñ par

vo bijlī ban ke chamkā dāman-e-sub.h-e-gulistāñ par

lahu se main ne likha tha jo kuchh diwar-e-zindan par

wo bijli ban ke chamka daman-e-subh-e-gulistan par

na kisī aah kī āvāz na zanjīr kā shor

aaj kyā ho gayā zindāñ meñ ki zindāñ chup hai

na kisi aah ki aawaz na zanjir ka shor

aaj kya ho gaya zindan mein ki zindan chup hai

qafas se duur sahī mausam-e-bahār to hai

asīro aao zarā zikr-e-āshiyāñ ho jaa.e

qafas se dur sahi mausam-e-bahaar to hai

asiro aao zara zikr-e-ashiyan ho jae

dīvār-e-zindāñ ke pīchhe

jurm-e-mohabbat meñ baiThā huuñ

diwar-e-zindan ke pichhe

jurm-e-mohabbat mein baiTha hun

jaane kitne be-qusūroñ ko sazā.eñ mil rahīñ

jhuuT lagtā hai tumheñ to jail jā kar dekhiye

jaane kitne be-qusuron ko sazaen mil rahin

jhuT lagta hai tumhein to jail ja kar dekhiye

ham vahshiyoñ kā maskan kyā pūchhtā hai zālim

sahrā hai to sahrā hai zindāñ hai to zindāñ hai

hum wahshiyon ka maskan kya puchhta hai zalim

sahra hai to sahra hai zindan hai to zindan hai

maiñ santarī huuñ auratoñ kī jail kā huzūr

do-chār qaidī is liye kam gin rahā huuñ maiñ

main santari hun auraton ki jail ka huzur

do-chaar qaidi is liye kam gin raha hun main

kin shahīdoñ ke lahū ke ye farozāñ haiñ charāġh

raushnī sī jo hai zindāñ ke har ik rauzan meñ

kin shahidon ke lahu ke ye farozan hain charagh

raushni si jo hai zindan ke har ek rauzan mein

jo qaidī-e-mehan the 'jamīla' vo chal base

zindāñ meñ koī sāhab-e-zindāñ nahīñ rahā

jo qaidi-e-mehan the 'jamila' wo chal base

zindan mein koi sahab-e-zindan nahin raha

patthar taane log khaḌe haiñ

zindāñ kī dīvār ke pīchhe

patthar tane log khaDe hain

zindan ki diwar ke pichhe

zindāñ se nikalne kī ye tadbīr ġhalat hai

zanjīr ke TukḌe karo dīvār girā do

zindan se nikalne ki ye tadbir ghalat hai

zanjir ke TukDe karo diwar gira do

zindāñ kī to apne sair tū kar

shāyad koī be-gunāh nikle

zindan ki to apne sair tu kar

shayad koi be-gunah nikle

haa.e zanjīr-shikan vo kashish-e-fasl-e-bahār

aur zindāñ se nikalnā tire dīvāne kā

hae zanjir-shikan wo kashish-e-fasl-e-bahaar

aur zindan se nikalna tere diwane ka