جو گزاری نہ جا سکی ہم سے

ہم نے وہ زندگی گزاری ہے

میں بھی بہت عجیب ہوں اتنا عجیب ہوں کہ بس

خود کو تباہ کر لیا اور ملال بھی نہیں

یہ مجھے چین کیوں نہیں پڑتا

ایک ہی شخص تھا جہان میں کیا

زندگی کس طرح بسر ہوگی

دل نہیں لگ رہا محبت میں

ساری دنیا کے غم ہمارے ہیں

اور ستم یہ کہ ہم تمہارے ہیں

بہت نزدیک آتی جا رہی ہو

بچھڑنے کا ارادہ کر لیا کیا

کون اس گھر کی دیکھ بھال کرے

روز اک چیز ٹوٹ جاتی ہے

کس لیے دیکھتی ہو آئینہ

تم تو خود سے بھی خوب صورت ہو

کیا ستم ہے کہ اب تری صورت

غور کرنے پہ یاد آتی ہے

کیسے کہیں کہ تجھ کو بھی ہم سے ہے واسطہ کوئی

تو نے تو ہم سے آج تک کوئی گلہ نہیں کیا

مستقل بولتا ہی رہتا ہوں

کتنا خاموش ہوں میں اندر سے

مجھے اب تم سے ڈر لگنے لگا ہے

تمہیں مجھ سے محبت ہو گئی کیا

علاج یہ ہے کہ مجبور کر دیا جاؤں

وگرنہ یوں تو کسی کی نہیں سنی میں نے

ہم کو یاروں نے یاد بھی نہ رکھا

جونؔ یاروں کے یار تھے ہم تو

اس گلی نے یہ سن کے صبر کیا

جانے والے یہاں کے تھے ہی نہیں

دل کی تکلیف کم نہیں کرتے

اب کوئی شکوہ ہم نہیں کرتے

کیا کہا عشق جاودانی ہے!

آخری بار مل رہی ہو کیا

کتنی دل کش ہو تم کتنا دلجو ہوں میں

کیا ستم ہے کہ ہم لوگ مر جائیں گے

اور تو کیا تھا بیچنے کے لئے

اپنی آنکھوں کے خواب بیچے ہیں

سوچتا ہوں کہ اس کی یاد آخر

اب کسے رات بھر جگاتی ہے

تمہارا ہجر منا لوں اگر اجازت ہو

میں دل کسی سے لگا لوں اگر اجازت ہو

یارو کچھ تو ذکر کرو تم اس کی قیامت بانہوں کا

وہ جو سمٹتے ہوں گے ان میں وہ تو مر جاتے ہوں گے

بن تمہارے کبھی نہیں آئی

کیا مری نیند بھی تمہاری ہے

میری بانہوں میں بہکنے کی سزا بھی سن لے

اب بہت دیر میں آزاد کروں گا تجھ کو

زندگی ایک فن ہے لمحوں کو

اپنے انداز سے گنوانے کا

میں رہا عمر بھر جدا خود سے

یاد میں خود کو عمر بھر آیا

اب مری کوئی زندگی ہی نہیں

اب بھی تم میری زندگی ہو کیا

کتنے عیش سے رہتے ہوں گے کتنے اتراتے ہوں گے

جانے کیسے لوگ وہ ہوں گے جو اس کو بھاتے ہوں گے

نیا اک رشتہ پیدا کیوں کریں ہم

بچھڑنا ہے تو جھگڑا کیوں کریں ہم

یوں جو تکتا ہے آسمان کو تو

کوئی رہتا ہے آسمان میں کیا

یاد اسے انتہائی کرتے ہیں

سو ہم اس کی برائی کرتے ہیں

وہ جو نہ آنے والا ہے نا اس سے مجھ کو مطلب تھا

آنے والوں سے کیا مطلب آتے ہیں آتے ہوں گے

اب نہیں کوئی بات خطرے کی

اب سبھی کو سبھی سے خطرہ ہے

کیا تکلف کریں یہ کہنے میں

جو بھی خوش ہے ہم اس سے جلتے ہیں

اے شخص میں تیری جستجو سے

بے زار نہیں ہوں تھک گیا ہوں

جان لیوا تھیں خواہشیں ورنہ

وصل سے انتظار اچھا تھا

مجھ کو عادت ہے روٹھ جانے کی

آپ مجھ کو منا لیا کیجے

اب تو ہر بات یاد رہتی ہے

غالباً میں کسی کو بھول گیا

اک عجب حال ہے کہ اب اس کو

یاد کرنا بھی بے وفائی ہے

کوئی مجھ تک پہنچ نہیں پاتا

اتنا آسان ہے پتا میرا

نہیں دنیا کو جب پروا ہماری

تو پھر دنیا کی پروا کیوں کریں ہم

کام کی بات میں نے کی ہی نہیں

یہ مرا طور زندگی ہی نہیں

اپنا رشتہ زمیں سے ہی رکھو

کچھ نہیں آسمان میں رکھا

میں جو ہوں جونؔ ایلیا ہوں جناب

اس کا بے حد لحاظ کیجئے گا

ہاں ٹھیک ہے میں اپنی انا کا مریض ہوں

آخر مرے مزاج میں کیوں دخل دے کوئی

اپنے سب یار کام کر رہے ہیں

اور ہم ہیں کہ نام کر رہے ہیں

میری ہر بات بے اثر ہی رہی

نقص ہے کچھ مرے بیان میں کیا

آج مجھ کو بہت برا کہہ کر

آپ نے نام تو لیا میرا

ایک ہی تو ہوس رہی ہے ہمیں

اپنی حالت تباہ کی جائے

جرم میں ہم کمی کریں بھی تو کیوں

تم سزا بھی تو کم نہیں کرتے