apnī anā kī aaj bhī taskīn ham ne kī

jī bhar ke us ke husn kī tauhīn ham ne kī

apni ana ki aaj bhi taskin hum ne ki

ji bhar ke us ke husn ki tauhin hum ne ki

sūraj huuñ zindagī kī ramaq chhoḌ jā.ūñgā

maiñ Duub bhī gayā to shafaq chhoḌ jā.ūñgā

suraj hun zindagi ki ramaq chhoD jaunga

main Dub bhi gaya to shafaq chhoD jaunga

vo chāñd hai to aks bhī paanī meñ aa.egā

kirdār ḳhud ubhar ke kahānī meñ aa.egā

wo chand hai to aks bhi pani mein aaega

kirdar KHud ubhar ke kahani mein aaega

pyāso raho na dasht meñ bārish ke muntazir

maaro zamīñ pe paañv ki paanī nikal paḌe

pyaso raho na dasht mein barish ke muntazir

maro zamin pe panw ki pani nikal paDe

pichhle baras bhī boī thiiñ lafzoñ kī khetiyāñ

ab ke baras bhī is ke sivā kuchh nahīñ kiyā

pichhle baras bhi boi thin lafzon ki khetiyan

ab ke baras bhi is ke siwa kuchh nahin kiya

maiñ tire dar kā bhikārī tū mire dar kā faqīr

aadmī is daur meñ ḳhuddār ho saktā nahīñ

main tere dar ka bhikari tu mere dar ka faqir

aadmi is daur mein KHuddar ho sakta nahin

mile mujhe bhī agar koī shaam fursat kī

maiñ kyā huuñ kaun huuñ sochūñgā apne baare meñ

mile mujhe bhi agar koi sham fursat ki

main kya hun kaun hun sochunga apne bare mein

maiñ ā.īna banūñgā tū patthar uThā.egā

ik din khulī saḌak pe ye naubat bhī aa.egī

main aaina banunga tu patthar uThaega

ek din khuli saDak pe ye naubat bhi aaegi

hote hī shaam jalne lagā yaad kā alaao

aañsū sunāne dukh kī kahānī nikal paḌe

hote hi sham jalne laga yaad ka alao

aansu sunane dukh ki kahani nikal paDe

ab tū darvāze se apne naam kī taḳhtī utaar

lafz nañge ho ga.e shohrat bhī gaalī ho ga.ī

ab tu darwaze se apne nam ki taKHti utar

lafz nange ho gae shohrat bhi gali ho gai

us ne bhī ka.ī roz se ḳhvāhish nahīñ oḌhī

maiñ ne bhī ka.ī din se irāda nahīñ pahnā

us ne bhi kai roz se KHwahish nahin oDhi

main ne bhi kai din se irada nahin pahna

ġhurbat kī tez aag pe aksar pakā.ī bhuuk

ḳhush-hāliyoñ ke shahr meñ kyā kuchh nahīñ kiyā

ghurbat ki tez aag pe aksar pakai bhuk

KHush-haaliyon ke shahr mein kya kuchh nahin kiya

mom kī sīḌhī pe chaḌh kar chhū rahe the āftāb

phuul se chehroñ ko ye koshish bahut mahñgī paḌī

mom ki siDhi pe chaDh kar chhu rahe the aaftab

phul se chehron ko ye koshish bahut mahngi paDi

maarā kisī ne sañg to Thokar lagī mujhe

dekhā to āsmāñ thā zamīñ par paḌā huā

mara kisi ne sang to Thokar lagi mujhe

dekha to aasman tha zamin par paDa hua

ek bhī ḳhvāhish ke hāthoñ meñ na mehñdī lag sakī

mere jazboñ meñ na dūlhā ban sakā ab tak koī

ek bhi KHwahish ke hathon mein na mehndi lag saki

mere jazbon mein na dulha ban saka ab tak koi

paḌhte paḌhte thak ga.e sab log tahrīreñ mirī

likhte likhte shahr kī dīvār kaalī ho ga.ī

paDhte paDhte thak gae sab log tahriren meri

likhte likhte shahr ki diwar kali ho gai

sūraj huuñ chamakne kā bhī haq chāhiye mujh ko

maiñ kohr meñ lipTā huuñ shafaq chāhiye mujh ko

suraj hun chamakne ka bhi haq chahiye mujh ko

main kohr mein lipTa hun shafaq chahiye mujh ko

vo boltā thā magar lab nahīñ hilātā thā

ishāra kartā thā jumbish na thī ishāre meñ

wo bolta tha magar lab nahin hilata tha

ishaara karta tha jumbish na thi ishaare mein

ro.e hue bhī un ko ka.ī saal ho ga.e

āñkhoñ meñ āñsuoñ kī numā.ish nahīñ huī

roe hue bhi un ko kai sal ho gae

aankhon mein aansuon ki numaish nahin hui

'sājid' tū phir se ḳhāna-e-dil meñ talāsh kar

mumkin hai koī yaad purānī nikal paḌe

'sajid' tu phir se KHana-e-dil mein talash kar

mumkin hai koi yaad purani nikal paDe

mire ghar se ziyāda duur sahrā bhī nahīñ lekin

udāsī naam hī letī nahīñ bāhar nikalne kā

mere ghar se ziyaada dur sahra bhi nahin lekin

udasi nam hi leti nahin bahar nikalne ka

pyaar karne bhī na paayā thā ki rusvā.ī milī

jurm se pahle hī mujh ko sañg-e-ḳhamyāza lagā

pyar karne bhi na paya tha ki ruswai mili

jurm se pahle hi mujh ko sang-e-KHamyaza laga

andar thī jitnī aag vo ThanDī na ho sakī

paanī thā sirf ghaas ke uupar paḌā huā

andar thi jitni aag wo ThanDi na ho saki

pani tha sirf ghas ke upar paDa hua

ye tire ash.ār terī ma.anavī aulād haiñ

apne bachche bechnā 'iqbāl-sājid' chhoḌ de

ye tere ashaar teri manawi aulad hain

apne bachche bechna 'iqbaal-sajid' chhoD de

maiñ ḳhuun bahā kar bhī huā baaġh meñ rusvā

us gul ne magar kaam pasīne se nikālā

main KHun baha kar bhi hua bagh mein ruswa

us gul ne magar kaam pasine se nikala

darvesh nazar aatā thā har haal meñ lekin

'sājid' ne libās itnā bhī saada nahīñ pahnā

darwesh nazar aata tha har haal mein lekin

'sajid' ne libas itna bhi sada nahin pahna

baḌh gayā hai is qadar ab surḳh-rū hone kā shauq

log apne ḳhuun se jismoñ ko tar karne lage

baDh gaya hai is qadar ab surKH-ru hone ka shauq

log apne KHun se jismon ko tar karne lage

musalsal jāgne ke ba.ad ḳhvāhish ruuTh jaatī hai

chalan sīkhā hai bachche kī tarah us ne machalne kā

musalsal jagne ke baad KHwahish ruTh jati hai

chalan sikha hai bachche ki tarah us ne machalne ka

sazā to milnā thī mujh ko barahana lafzoñ kī

zabāñ ke saath laboñ ko rafū bhī honā thā

saza to milna thi mujh ko barahana lafzon ki

zaban ke sath labon ko rafu bhi hona tha

jaise har chehre kī āñkheñ sar ke pīchhe aa lagīñ

sab ke sab ulTe hī qadmoñ se safar karne lage

jaise har chehre ki aankhen sar ke pichhe aa lagin

sab ke sab ulTe hi qadmon se safar karne lage

duniyā ne zar ke vāste kyā kuchh nahīñ kiyā

aur ham ne shā.erī ke sivā kuchh nahīñ kiyā

duniya ne zar ke waste kya kuchh nahin kiya

aur hum ne shaeri ke siwa kuchh nahin kiya

mujh pe patthar pheñkne vāloñ ko tere shahr meñ

narm-o-nāzuk haath bhī dete haiñ patthar toḌ kar

mujh pe patthar phenkne walon ko tere shahr mein

narm-o-nazuk hath bhi dete hain patthar toD kar

kaT gayā jism magar saa.e to mahfūz rahe

merā shīrāza bikhar kar bhī misālī niklā

kaT gaya jism magar sae to mahfuz rahe

mera shiraaza bikhar kar bhi misali nikla

mire hī harf dikhāte the merī shakl mujhe

ye ishtihār mire rū-ba-rū bhī honā thā

mere hi harf dikhate the meri shakl mujhe

ye ishtihaar mere ru-ba-ru bhi hona tha

bagūla ban ke samundar meñ ḳhaak uḌānā thā

ki lahr lahr mujhe tund-ḳhū bhī honā thā

bagula ban ke samundar mein KHak uDana tha

ki lahr lahr mujhe tund-KHu bhi hona tha

fikr-e-me.ār-e-suḳhan bā.is-e-āzār huī

tañg rakkhā to hameñ apnī qabā ne rakkhā

fikr-e-mear-e-suKHan bais-e-azar hui

tang rakkha to hamein apni qaba ne rakkha