Sher on Wada

vafā kareñge nibāheñge baat māneñge

tumheñ bhī yaad hai kuchh ye kalām kis kā thā

wafa karenge nibahenge baat manenge

tumhein bhi yaad hai kuchh ye kalam kis ka tha

ham ko un se vafā kī hai ummīd

jo nahīñ jānte vafā kyā hai

hum ko un se wafa ki hai ummid

jo nahin jaante wafa kya hai

na koī va.ada na koī yaqīñ na koī umiid

magar hameñ to tirā intizār karnā thā

na koi wada na koi yaqin na koi umid

magar hamein to tera intizar karna tha

tire va.adoñ pe kahāñ tak mirā dil fareb khaa.e

koī aisā kar bahāna mirī aas TuuT jaa.e

tere wadon pe kahan tak mera dil fareb khae

koi aisa kar bahana meri aas TuT jae

ādatan tum ne kar diye va.ade

ādatan ham ne e'tibār kiyā

aadatan tum ne kar diye wade

aadatan hum ne e'tibar kiya

ġhazab kiyā tire va.ade pe e'tibār kiyā

tamām raat qayāmat kā intizār kiyā

ghazab kiya tere wade pe e'tibar kiya

tamam raat qayamat ka intizar kiya

terī majbūriyāñ durust magar

tū ne va.ada kiyā thā yaad to kar

teri majburiyan durust magar

tu ne wada kiya tha yaad to kar

vo jo ham meñ tum meñ qarār thā tumheñ yaad ho ki na yaad ho

vahī yaanī va.ada nibāh kā tumheñ yaad ho ki na yaad ho

wo jo hum mein tum mein qarar tha tumhein yaad ho ki na yaad ho

wahi yani wada nibah ka tumhein yaad ho ki na yaad ho

kyuuñ pashemāñ ho agar va.ada vafā ho na sakā

kahīñ va.ade bhī nibhāne ke liye hote haiñ

kyun pasheman ho agar wada wafa ho na saka

kahin wade bhi nibhane ke liye hote hain

tire va.ade par jiye ham to ye jaan jhuuT jaanā

ki ḳhushī se mar na jaate agar e'tibār hotā

tere wade par jiye hum to ye jaan jhuT jaana

ki KHushi se mar na jate agar e'tibar hota

ek ik baat meñ sachchā.ī hai us kī lekin

apne va.adoñ se mukar jaane ko jī chāhtā hai

ek ek baat mein sachchai hai us ki lekin

apne wadon se mukar jaane ko ji chahta hai

ab tum kabhī na aaoge yaanī kabhī kabhī

ruḳhsat karo mujhe koī va.ada kiye baġhair

ab tum kabhi na aaoge yani kabhi kabhi

ruKHsat karo mujhe koi wada kiye baghair

ḳhātir se yā lihāz se maiñ maan to gayā

jhūTī qasam se aap kā īmān to gayā

KHatir se ya lihaz se main man to gaya

jhuTi qasam se aap ka iman to gaya

ek muddat se na qāsid hai na ḳhat hai na payām

apne va.ade ko to kar yaad mujhe yaad na kar

ek muddat se na qasid hai na KHat hai na payam

apne wade ko to kar yaad mujhe yaad na kar

saaf inkār agar ho to tasallī ho jaa.e

jhūTe va.adoñ se tire rañj sivā hotā hai

saf inkar agar ho to tasalli ho jae

jhuTe wadon se tere ranj siwa hota hai

subūt hai ye mohabbat kī sāda-lauhī kā

jab us ne va.ada kiyā ham ne e'tibār kiyā

subut hai ye mohabbat ki sada-lauhi ka

jab us ne wada kiya hum ne e'tibar kiya

din guzārā thā baḌī mushkil se

phir tirā va.ada-e-shab yaad aayā

din guzara tha baDi mushkil se

phir tera wada-e-shab yaad aaya

kis muñh se kah rahe ho hameñ kuchh ġharaz nahīñ

kis muñh se tum ne va.ada kiyā thā nibāh kā

kis munh se kah rahe ho hamein kuchh gharaz nahin

kis munh se tum ne wada kiya tha nibah ka

tere vaade ko kabhī jhuuT nahīñ samjhūñgā

aaj kī raat bhī darvāza khulā rakkhūñgā

tere wade ko kabhi jhuT nahin samjhunga

aaj ki raat bhi darwaza khula rakkhunga

phir baiThe baiThe vāda-e-vasl us ne kar liyā

phir uTh khaḌā huā vahī rog intizār kā

phir baiThe baiThe wada-e-wasl us ne kar liya

phir uTh khaDa hua wahi rog intizar ka

maiñ bhī hairān huuñ ai 'dāġh' ki ye baat hai kyā

va.ada vo karte haiñ aatā hai tabassum mujh ko

main bhi hairan hun ai 'dagh' ki ye baat hai kya

wada wo karte hain aata hai tabassum mujh ko

maiñ us ke va.ade kā ab bhī yaqīn kartā huuñ

hazār baar jise aazmā liyā maiñ ne

main us ke wade ka ab bhi yaqin karta hun

hazar bar jise aazma liya main ne

ummīd to bañdh jaatī taskīn to ho jaatī

va.ada na vafā karte va.ada to kiyā hotā

ummid to bandh jati taskin to ho jati

wada na wafa karte wada to kiya hota

va.ada nahīñ payām nahīñ guftugū nahīñ

hairat hai ai ḳhudā mujhe kyuuñ intizār hai

wada nahin payam nahin guftugu nahin

hairat hai ai KHuda mujhe kyun intizar hai

thā va.ada shaam kā magar aa.e vo raat ko

maiñ bhī kivāḌ kholne fauran nahīñ gayā

tha wada sham ka magar aae wo raat ko

main bhi kiwaD kholne fauran nahin gaya

vo ummīd kyā jis kī ho intihā

vo va.ada nahīñ jo vafā ho gayā

wo ummid kya jis ki ho intiha

wo wada nahin jo wafa ho gaya

aur kuchh der sitāro Thahro

us kā va.ada hai zarūr aa.egā

aur kuchh der sitaro Thahro

us ka wada hai zarur aaega

phir chāhe to na aanā o aan baan vaale

jhūTā hī va.ada kar le sachchī zabān vaale

phir chahe to na aana o aan ban wale

jhuTa hi wada kar le sachchi zaban wale

barsoñ hue na tum ne kiyā bhuul kar bhī yaad

va.ade kī tarah ham bhī farāmosh ho ga.e

barson hue na tum ne kiya bhul kar bhi yaad

wade ki tarah hum bhi faramosh ho gae

aap to muñh pher kar kahte haiñ aane ke liye

vasl kā va.ada zarā āñkheñ milā kar kījiye

aap to munh pher kar kahte hain aane ke liye

wasl ka wada zara aankhen mila kar kijiye

aap ne jhūTā va.ada kar ke

aaj hamārī umr baḌhā dī

aap ne jhuTa wada kar ke

aaj hamari umr baDha di

vo phir va.ada milne kā karte haiñ yaanī

abhī kuchh dinoñ ham ko jiinā paḌegā

wo phir wada milne ka karte hain yani

abhi kuchh dinon hum ko jina paDega

jhūTe vaade bhī nahīñ karte aap

koī jiine kā sahārā hī nahīñ

jhuTe wade bhi nahin karte aap

koi jine ka sahaara hi nahin

jhūTe va.adoñ par thī apnī zindagī

ab to vo bhī aasrā jaatā rahā

jhuTe wadon par thi apni zindagi

ab to wo bhi aasra jata raha

dil kabhī laakh ḳhushāmad pe bhī raazī na huā

kabhī ik jhūTe hī va.ade pe bahalte dekhā

dil kabhi lakh KHushamad pe bhi raazi na hua

kabhi ek jhuTe hi wade pe bahalte dekha

jo tumhārī tarah tum se koī jhūTe va.ade kartā

tumhīñ munsifī se kah do tumheñ e'tibār hotā

jo tumhaari tarah tum se koi jhuTe wade karta

tumhin munsifi se kah do tumhein e'tibar hota

bhūlne vaale ko shāyad yaad va.ada aa gayā

mujh ko dekhā muskurāyā ḳhud-ba-ḳhud sharmā gayā

bhulne wale ko shayad yaad wada aa gaya

mujh ko dekha muskuraya KHud-ba-KHud sharma gaya

maan letā huuñ tere va.ade ko

bhuul jaatā huuñ maiñ ki tū hai vahī

man leta hun tere wade ko

bhul jata hun main ki tu hai wahi

in vafādārī ke vādoñ ko ilāhī kyā huā

vo vafā.eñ karne vaale bevafā kyuuñ ho ga.e

in wafadari ke wadon ko ilahi kya hua

wo wafaen karne wale bewafa kyun ho gae

savāl-e-vasl par kuchh soch kar us ne kahā mujh se

abhī va.ada to kar sakte nahīñ haiñ ham magar dekho

sawal-e-wasl par kuchh soch kar us ne kaha mujh se

abhi wada to kar sakte nahin hain hum magar dekho

va.ada jhūTā kar liyā chaliye tasallī ho ga.ī

hai zarā sī baat ḳhush karnā dil-e-nāshād kā

wada jhuTa kar liya chaliye tasalli ho gai

hai zara si baat KHush karna dil-e-nashad ka

saaf kah dījiye va.ada hī kiyā thā kis ne

uzr kyā chāhiye jhūToñ ke mukarne ke liye

saf kah dijiye wada hi kiya tha kis ne

uzr kya chahiye jhuTon ke mukarne ke liye

us ke vādoñ se itnā to sābit huā us ko thoḌā sā pās-e-ta.alluq to hai

ye alag baat hai vo hai vāda-shikan ye bhī kuchh kam nahīñ us ne vaade kiye

us ke wadon se itna to sabit hua us ko thoDa sa pas-e-talluq to hai

ye alag baat hai wo hai wada-shikan ye bhi kuchh kam nahin us ne wade kiye

vo aur va.ada vasl kā qāsid nahīñ nahīñ

sach sach batā ye lafz unhī kī zabāñ ke haiñ

wo aur wada wasl ka qasid nahin nahin

sach sach bata ye lafz unhi ki zaban ke hain

mujhe hai e'tibār-e-va.ada lekin

tumheñ ḳhud e'tibār aa.e na aa.e

mujhe hai e'tibar-e-wada lekin

tumhein KHud e'tibar aae na aae

tujh ko dekhā tire va.ade dekhe

ūñchī dīvār ke lambe saa.e

tujh ko dekha tere wade dekhe

unchi diwar ke lambe sae

va.ada vo kar rahe haiñ zarā lutf dekhiye

va.ada ye kah rahā hai na karnā vafā mujhe

wada wo kar rahe hain zara lutf dekhiye

wada ye kah raha hai na karna wafa mujhe

bas ek baar hī toḌā jahāñ ne ahd-e-vafā

kisī se ham ne phir ahd-e-vafā kiyā hī nahīñ

bas ek bar hi toDa jahan ne ahd-e-wafa

kisi se hum ne phir ahd-e-wafa kiya hi nahin

ba.az va.ade kiye nahīñ jaate

phir bhī un ko nibhāyā jaatā hai

baz wade kiye nahin jate

phir bhi un ko nibhaya jata hai

aap kī qasmoñ kā aur mujh ko yaqīñ

ek bhī va.ada kabhī puurā kiyā

aap ki qasmon ka aur mujh ko yaqin

ek bhi wada kabhi pura kiya