Sher on Gunah

koī samjhe to ek baat kahūñ

ishq taufīq hai gunāh nahīñ

koi samjhe to ek baat kahun

ishq taufiq hai gunah nahin

yuuñ zindagī guzār rahā huuñ tire baġhair

jaise koī gunāh kiye jā rahā huuñ maiñ

yun zindagi guzar raha hun tere baghair

jaise koi gunah kiye ja raha hun main

ik fursat-e-gunāh milī vo bhī chaar din

dekhe haiñ ham ne hausle parvardigār ke

ek fursat-e-gunah mili wo bhi chaar din

dekhe hain hum ne hausle parwardigar ke

terī baḳhshish ke bharose pe ḳhatā.eñ kī haiñ

terī rahmat ke sahāre ne gunahgār kiyā

teri baKHshish ke bharose pe KHataen ki hain

teri rahmat ke sahaare ne gunahgar kiya

aatā hai dāġh-e-hasrat-e-dil kā shumār yaad

mujh se mire gunah kā hisāb ai ḳhudā na maañg

aata hai dagh-e-hasrat-e-dil ka shumar yaad

mujh se mere gunah ka hisab ai KHuda na mang

is bharose pe kar rahā huuñ gunāh

baḳhsh denā to terī fitrat hai

is bharose pe kar raha hun gunah

baKHsh dena to teri fitrat hai

mire gunāh ziyāda haiñ yā tirī rahmat

karīm tū hī batā de hisāb kar ke mujhe

mere gunah ziyaada hain ya teri rahmat

karim tu hi bata de hisab kar ke mujhe

gunāh gin ke maiñ kyuuñ apne dil ko chhoTā karūñ

sunā hai tere karam kā koī hisāb nahīñ

gunah gin ke main kyun apne dil ko chhoTa karun

suna hai tere karam ka koi hisab nahin

farishte hashr meñ pūchheñge pāk-bāzoñ se

gunāh kyuuñ na kiye kyā ḳhudā ġhafūr na thā

farishte hashr mein puchhenge pak-bazon se

gunah kyun na kiye kya KHuda ghafur na tha

apne kisī amal pe nadāmat nahīñ mujhe

thā nek-dil bahut jo gunahgār mujh meñ thā

apne kisi amal pe nadamat nahin mujhe

tha nek-dil bahut jo gunahgar mujh mein tha

gunāhgār to rahmat ko muñh dikhā na sakā

jo be-gunāh thā vo bhī nazar milā na sakā

gunahgar to rahmat ko munh dikha na saka

jo be-gunah tha wo bhi nazar mila na saka

pūchhegā jo ḳhudā to ye kah deñge hashr meñ

haañ haañ gunah kiyā tirī rahmat ke zor par

puchhega jo KHuda to ye kah denge hashr mein

han han gunah kiya teri rahmat ke zor par

shirkat gunāh meñ bhī rahe kuchh savāb kī

tauba ke saath toḌiye botal sharāb kī

shirkat gunah mein bhi rahe kuchh sawab ki

tauba ke sath toDiye botal sharab ki

vo kaun haiñ jinheñ tauba kī mil ga.ī fursat

hameñ gunāh bhī karne ko zindagī kam hai

wo kaun hain jinhen tauba ki mil gai fursat

hamein gunah bhi karne ko zindagi kam hai

mire ḳhudā ne kiyā thā mujhe asīr-e-bahisht

mire gunah ne rihā.ī mujhe dilā.ī hai

mere KHuda ne kiya tha mujhe asir-e-bahisht

mere gunah ne rihai mujhe dilai hai

dekhā to sab ke sar pe gunāhoñ kā bojh thā

ḳhush the tamām nekiyāñ dariyā meñ Daal kar

dekha to sab ke sar pe gunahon ka bojh tha

KHush the tamam nekiyan dariya mein Dal kar

gunah-gāroñ meñ shāmil haiñ gunāhoñ se nahīñ vāqif

sazā ko jānte haiñ ham ḳhudā jaane ḳhatā kyā hai

gunah-garon mein shamil hain gunahon se nahin waqif

saza ko jaante hain hum KHuda jaane KHata kya hai

vo jo raat mujh ko baḌe adab se salām kar ke chalā gayā

use kyā ḳhabar mire dil meñ bhī kabhī ārzū-e-gunāh thī

wo jo raat mujh ko baDe adab se salam kar ke chala gaya

use kya KHabar mere dil mein bhi kabhi aarzu-e-gunah thi

rahmatoñ se nibāh meñ guzrī

umr saarī gunāh meñ guzrī

rahmaton se nibah mein guzri

umr sari gunah mein guzri

gunāhoñ se hameñ raġhbat na thī magar yā rab

tirī nigāh-e-karam ko bhī muñh dikhānā thā

gunahon se hamein raghbat na thi magar ya rab

teri nigah-e-karam ko bhi munh dikhana tha

sunā hai ḳhvāb mukammal kabhī nahīñ hote

sunā hai ishq ḳhatā hai so kar ke dekhte haiñ

suna hai KHwab mukammal kabhi nahin hote

suna hai ishq KHata hai so kar ke dekhte hain

mohabbat nek-o-bad ko sochne de ġhair-mumkin hai

baḌhī jab be-ḳhudī phir kaun Dartā hai gunāhoñ se

mohabbat nek-o-bad ko sochne de ghair-mumkin hai

baDhi jab be-KHudi phir kaun Darta hai gunahon se

ḳhud-parastī ḳhudā na ban jaa.e

ehtiyātan gunāh kartā huuñ

KHud-parasti KHuda na ban jae

ehtiyatan gunah karta hun

mujhe gunāh meñ apnā surāġh miltā hai

vagarna pārsā-o-dīn-dār maiñ bhī thā

mujhe gunah mein apna suragh milta hai

wagarna parsa-o-din-dar main bhi tha

ruuh meñ reñgtī rahtī hai gunah kī ḳhvāhish

is amarbel ko ik din koī dīvār mile

ruh mein rengti rahti hai gunah ki KHwahish

is amarbel ko ek din koi diwar mile

lazzat kabhī thī ab to musībat sī ho ga.ī

mujh ko gunāh karne kī aadat sī ho ga.ī

lazzat kabhi thi ab to musibat si ho gai

mujh ko gunah karne ki aadat si ho gai

ishq meñ vo bhī ek vaqt hai jab

be-gunāhī gunāh hai pyāre

ishq mein wo bhi ek waqt hai jab

be-gunahi gunah hai pyare

yaad aa.e haiñ uff gunah kyā kyā

haath uThā.e haiñ jab duā ke liye

yaad aae hain uff gunah kya kya

hath uThae hain jab dua ke liye

nā-karda gunāhoñ kī bhī hasrat kī mile daad

yā rab agar in karda gunāhoñ kī sazā hai

na-karda gunahon ki bhi hasrat ki mile dad

ya rab agar in karda gunahon ki saza hai

mahsūs bhī ho jaa.e to hotā nahīñ bayāñ

nāzuk sā hai jo farq gunāh o savāb meñ

mahsus bhi ho jae to hota nahin bayan

nazuk sa hai jo farq gunah o sawab mein

gunāh kar ke bhī ham riñd pāk-sāf rahe

sharāb pī to nadāmat ne aab aab kiyā

gunah kar ke bhi hum rind pak-saf rahe

sharab pi to nadamat ne aab aab kiya

'ārzū' jaam lo jhijak kaisī

pī lo aur dahshat-e-gunāh ga.ī

'arzu' jam lo jhijak kaisi

pi lo aur dahshat-e-gunah gai

ḳhāmosh ho ga.iiñ jo umañgeñ shabāb kī

phir jur.at-e-gunāh na kī ham bhī chup rahe

KHamosh ho gain jo umangen shabab ki

phir jurat-e-gunah na ki hum bhi chup rahe

kahegī hashr ke din us kī rahmat-e-be-had

ki be-gunāh se achchhā gunāh-gār rahā

kahegi hashr ke din us ki rahmat-e-be-had

ki be-gunah se achchha gunah-gar raha

ye kyā kahūñ ki mujh ko kuchh gunāh bhī aziiz haiñ

ye kyuuñ kahūñ ki zindagī savāb ke liye nahīñ

ye kya kahun ki mujh ko kuchh gunah bhi aziz hain

ye kyun kahun ki zindagi sawab ke liye nahin

kyā kījiye kashish hai kuchh aisī gunāh meñ

maiñ varna yuuñ fareb meñ aatā bahār ke

kya kijiye kashish hai kuchh aisi gunah mein

main warna yun fareb mein aata bahaar ke

zāhid umīd-e-rahmat-e-haq aur hajv-e-mai

pahle sharāb pī ke gunāh-gār bhī to ho

zahid umid-e-rahmat-e-haq aur hajw-e-mai

pahle sharab pi ke gunah-gar bhi to ho

guzar rahā huuñ kisī jannat-e-jamāl se maiñ

gunāh kartā huā nekiyāñ kamātā huā

guzar raha hun kisi jannat-e-jamal se main

gunah karta hua nekiyan kamata hua

na ranj-e-hijrat thā aur na shauq-e-safar thā dil meñ

sab apne apne gunāh kā bojh Dho rahe the

na ranj-e-hijrat tha aur na shauq-e-safar tha dil mein

sab apne apne gunah ka bojh Dho rahe the

tāzīr-e-jurm-e-ishq hai be-sarfa mohtasib

baḌhtā hai aur zauq-e-gunah yaañ sazā ke ba.ad

tazir-e-jurm-e-ishq hai be-sarfa mohtasib

baDhta hai aur zauq-e-gunah yan saza ke baad

mujh se ḳhalā meñ baat bhī karnā nahīñ rafīq

aise ḳhalā meñ baat bhī karnā hai ik gunāh

mujh se KHala mein baat bhi karna nahin rafiq

aise KHala mein baat bhi karna hai ek gunah