زندگی زندہ دلی کا ہے نام

مردہ دل خاک جیا کرتے ہیں

تیری صورت سے کسی کی نہیں ملتی صورت

ہم جہاں میں تری تصویر لیے پھرتے ہیں

وہ نہیں بھولتا جہاں جاؤں

ہائے میں کیا کروں کہاں جاؤں

سیہ بختی میں کب کوئی کسی کا ساتھ دیتا ہے

کہ تاریکی میں سایہ بھی جدا رہتا ہے انساں سے

آنے میں سدا دیر لگاتے ہی رہے تم

جاتے رہے ہم جان سے آتے ہی رہے تم

جستجو کرنی ہر اک امر میں نادانی ہے

جو کہ پیشانی پہ لکھی ہے وہ پیش آنی ہے

دریائے حسن اور بھی دو ہاتھ بڑھ گیا

انگڑائی اس نے نشے میں لی جب اٹھا کے ہاتھ

خود غلط ہے جو کہے ہوتی ہے تقدیر غلط

کہیں قسمت کی بھی ہو سکتی ہے تحریر غلط

رشک سے نام نہیں لیتے کہ سن لے نہ کوئی

دل ہی دل میں اسے ہم یاد کیا کرتے ہیں

معشوقوں سے امید وفا رکھتے ہو ناسخؔ

ناداں کوئی دنیا میں نہیں تم سے زیادہ

غیر سے کھیلی ہے ہولی یار نے

ڈالے مجھ پر دیدۂ خوں بار رنگ

تمام عمر یوں ہی ہو گئی بسر اپنی

شب فراق گئی روز انتظار آیا

لیتے لیتے کروٹیں تجھ بن جو گھبراتا ہوں میں

نام لے لے کر ترا راتوں کو چلاتا ہوں میں

تین تربینی ہیں دو آنکھیں مری

اب الہ آباد بھی پنجاب ہے

زلفوں میں کیا قید نہ ابرو سے کیا قتل

تو نے تو کوئی بات نہ مانی مرے دل کی

ہم مے کشوں کو ڈر نہیں مرنے کا محتسب

فردوس میں بھی سنتے ہیں نہر شراب ہے

اب کی ہولی میں رہا بے کار رنگ

اور ہی لایا فراق یار رنگ

اے اجل ایک دن آخر تجھے آنا ہے ولے

آج آتی شب فرقت میں تو احساں ہوتا

شبہ ناسخؔ نہیں کچھ میرؔ کی استادی میں

آپ بے بہرہ ہے جو معتقد میرؔ نہیں

کس طرح چھوڑوں یکایک تیری زلفوں کا خیال

ایک مدت کے یہ کالے ناگ ہیں پالے ہوئے

جس قدر ہم سے تم ہوئے نزدیک

اس قدر دور کر دیا ہم کو

بھولتا ہی نہیں وہ دل سے اسے

ہم نے سو سو طرح بھلا دیکھا

فرقت یار میں انسان ہوں میں یا کہ سحاب

ہر برس آ کے رلا جاتی ہے برسات مجھے

گیا وہ چھوڑ کر رستے میں مجھ کو

اب اس کا نقش پا ہے اور میں ہوں

کام اوروں کے جاری رہیں ناکام رہیں ہم

اب آپ کی سرکار میں کیا کام ہمارا

خواب ہی میں نظر آ جائے شب ہجر کہیں

سو مجھے حسرت دیدار نے سونے نہ دیا

کام کیا نکلے کسی تدبیر سے

آدمی مجبور ہے تقدیر سے

ہو گیا زرد پڑی جس پہ حسینوں کی نظر

یہ عجب گل ہیں کہ تاثیر خزاں رکھتے ہیں

وہ نظر آتا ہے مجھ کو میں نظر آتا نہیں

خوب کرتا ہوں اندھیرے میں نظارے رات کو

کرتی ہے مجھے قتل مرے یار کی تلوار

تلوار کی تلوار ہے رفتار کی رفتار

کس کی ہولی جشن نو روزی ہے آج

سرخ مے سے ساقیا دستار رنگ

گو تو ملتا نہیں پر دل کے تقاضے سے ہم

روز ہو آتے ہیں سو بار ترے کوچے میں

آتی جاتی ہے جا بہ جا بدلی

ساقیا جلد آ ہوا بدلی

دل سیہ ہے بال ہیں سب اپنے پیری میں سفید

گھر کے اندر ہے اندھیرا اور باہر چاندنی

رات دن ناقوس کہتے ہیں بآواز بلند

دیر سے بہتر ہے کعبہ گر بتوں میں تو نہیں

عین دانائی ہے ناسخؔ عشق میں دیوانگی

آپ سودائی ہیں جو کہتے ہیں سودائی مجھے

فرقت قبول رشک کے صدمے نہیں قبول

کیا آئیں ہم رقیب تیری انجمن میں ہے

منہ آپ کو دکھا نہیں سکتا ہے شرم سے

اس واسطے ہے پیٹھ ادھر آفتاب کی

دیکھ کر تجھ کو قدم اٹھ نہیں سکتا اپنا

بن گئے صورت دیوار ترے کوچے میں

جسم ایسا گھل گیا ہے مجھ مریض عشق کا

دیکھ کر کہتے ہیں سب تعویذ ہے بازو نہیں

رفعت کبھی کسی کی گوارا یہاں نہیں

جس سر زمیں کے ہم ہیں وہاں آسماں نہیں

تکلم ہی فقط ہے اس صنم کا

خدا کی طرح گویا بے دہاں ہے

تازگی ہے سخن کہنہ میں یہ بعد وفات

لوگ اکثر مرے جینے کا گماں رکھتے ہیں

ہم ضعیفوں کو کہاں آمد و شد کی طاقت

آنکھ کی بند ہوا کوچۂ جاناں پیدا

بہ زیر قصر گردوں کیا کوئی آرام سے سوئے

یہ چھت ایسی پرانی ہے کہ شبنم سے ٹپکتی ہے

بہت فریب سے ہم وحشیوں کو وحشت ہے

ہمارے دشت میں ناسخؔ کہیں سراب نہیں

تنگ آ جب جب کہا میں نے کہ مر جاؤں کہیں

بد گماں سمجھا کہ اس کو اشتیاق حور ہے

ہر پھر کے دائرے ہی میں رکھتا ہوں میں قدم

آئی کہاں سے گردش پرکار پاؤں میں

بعد مردن بھی ہے تیرا خوف مجھ کو اس قدر

آنکھ اٹھا کر میں نے جنت میں نہ دیکھا حور کو

صنم کوچہ ترا ہے اور میں ہوں

یہ زندان دغا ہے اور میں ہوں