Sher on Festival

dekhā hilāl-e-īd to tum yaad aa ga.e

is mahviyat meñ iid hamārī guzar ga.ī

dekha hilal-e-id to tum yaad aa gae

is mahwiyat mein id hamari guzar gai

raas aa jātīñ hameñ bhī iid kī ḳhushiyāñ tamām

kaash tū bhī paas hotā iid ke lamhāt meñ

ras aa jatin hamein bhi id ki KHushiyan tamam

kash tu bhi pas hota id ke lamhat mein

mujh ko ehsās-e-rañg-o-bū na huā

yuuñ bhī aksar bahār aa.ī hai

mujh ko ehsas-e-rang-o-bu na hua

yun bhi aksar bahaar aai hai

bahār aa.ī ki din holī ke aa.e

guloñ meñ rañg khelā jā rahā hai

bahaar aai ki din holi ke aae

gulon mein rang khela ja raha hai

ḳhud to aayā nahīñ aur iid chalī aa.ī hai

iid ke roz mujhe yuuñ na satā.e koī

KHud to aaya nahin aur id chali aai hai

id ke roz mujhe yun na satae koi

mujh ko to iid meñ bhī farāġhat kahāñ milī

laḌtī rahī hai saas savere se shaam tak

mujh ko to id mein bhi faraghat kahan mili

laDti rahi hai sas sawere se sham tak

vo sub.h-e-īd kā manzar tire tasavvur meñ

vo dil meñ aa ke adā tere muskurāne kī

wo subh-e-id ka manzar tere tasawwur mein

wo dil mein aa ke ada tere muskurane ki

vo rañg rañg ke chhīñTe paḌe ki us ke ba.ad

kabhī na phir na.e kapḌe pahan ke niklā maiñ

wo rang rang ke chhinTe paDe ki us ke baad

kabhi na phir nae kapDe pahan ke nikla main

vo kūdte uchhalte rangīn pairahan the

ma.asūm qahqahoñ meñ uḌtā gulāl dekhā

wo kudte uchhalte rangin pairahan the

masum qahqahon mein uDta gulal dekha

bahut hī ḳhushkī meñ guzrī hai is baras holī

gila hai tujh se ki giilā nahīñ kiyā mujh ko

bahut hi KHushki mein guzri hai is baras holi

gila hai tujh se ki gila nahin kiya mujh ko

mai pī ke iid kījiye guzrā mah-e-siyām

tasbīh rakhiye sāġhar-o-mīnā uThā.iye

mai pi ke id kijiye guzra mah-e-siyam

tasbih rakhiye saghar-o-mina uThaiye

shab jo holī kī hai milne ko tire mukhḌe se jaan

chāñd aur taare liye phirte haiñ afshāñ haath meñ

shab jo holi ki hai milne ko tere mukhDe se jaan

chand aur tare liye phirte hain afshan hath mein

nikle haiñ ghar se dekhne ko log māh-e-īd

aur dekhte haiñ abrū-e-ḳhamdār kī taraf

nikle hain ghar se dekhne ko log mah-e-id

aur dekhte hain abru-e-KHamdar ki taraf

iid hai ham ne bhī jaanā ki na hotī gar iid

mai-farosh aaj dar-e-mai-kada kyuuñ vā kartā

id hai hum ne bhi jaana ki na hoti gar id

mai-farosh aaj dar-e-mai-kada kyun wa karta

lab-e-dariyā pe dekh aa kar tamāshā aaj holī kā

bhañvar kaale ke daf baaje hai mauj ai yaar paanī meñ

lab-e-dariya pe dekh aa kar tamasha aaj holi ka

bhanwar kale ke daf baje hai mauj ai yar pani mein

kyā ḳhabar hai ham se mahjūroñ kī un ko roz-e-īd

jo gale mil kar baham sarf-e-mubārakbād haiñ

kya KHabar hai hum se mahjuron ki un ko roz-e-id

jo gale mil kar baham sarf-e-mubarakbaad hain