Sher on Ehsaas

apnī hālat kā ḳhud ehsās nahīñ hai mujh ko

maiñ ne auroñ se sunā hai ki pareshān huuñ maiñ

apni haalat ka KHud ehsas nahin hai mujh ko

main ne auron se suna hai ki pareshan hun main

ḳhudā aise ehsās kā naam hai

rahe sāmne aur dikhā.ī na de

KHuda aise ehsas ka nam hai

rahe samne aur dikhai na de

taklīf miT ga.ī magar ehsās rah gayā

ḳhush huuñ ki kuchh na kuchh to mire paas rah gayā

taklif miT gai magar ehsas rah gaya

KHush hun ki kuchh na kuchh to mere pas rah gaya

āgahī karb vafā sabr tamannā ehsās

mere hī siine meñ utre haiñ ye ḳhanjar saare

aagahi karb wafa sabr tamanna ehsas

mere hi sine mein utre hain ye KHanjar sare

maiñ us ke sāmne se guzartā huuñ is liye

tark-e-ta.alluqāt kā ehsās mar na jaa.e

main us ke samne se guzarta hun is liye

tark-e-talluqat ka ehsas mar na jae

maut kī pahlī alāmat sāhib

yahī ehsās kā mar jaanā hai

maut ki pahli alamat sahib

yahi ehsas ka mar jaana hai

kaisī biptā paal rakhī hai qurbat kī aur duurī kī

ḳhushbū maar rahī hai mujh ko apnī hī kastūrī kī

kaisi bipta pal rakhi hai qurbat ki aur duri ki

KHushbu mar rahi hai mujh ko apni hi kasturi ki

tanhā.ī ke lamhāt kā ehsās huā hai

jab tāroñ bharī raat kā ehsās huā hai

tanhai ke lamhat ka ehsas hua hai

jab taron bhari raat ka ehsas hua hai

mujhe ye Dar hai dil-e-zinda tū na mar jaa.e

ki zindagānī ibārat hai tere jiine se

mujhe ye Dar hai dil-e-zinda tu na mar jae

ki zindagani ibarat hai tere jine se

reza reza kar diyā jis ne mire ehsās ko

kis qadar hairān hai vo mujh ko yakjā dekh kar

reza reza kar diya jis ne mere ehsas ko

kis qadar hairan hai wo mujh ko yakja dekh kar

mire andar ka.ī ehsās patthar ho rahe haiñ

ye shīrāza bikharnā ab zarūrī ho gayā hai

mere andar kai ehsas patthar ho rahe hain

ye shiraaza bikharna ab zaruri ho gaya hai

mujh ko ehsās-e-rañg-o-bū na huā

yuuñ bhī aksar bahār aa.ī hai

mujh ko ehsas-e-rang-o-bu na hua

yun bhi aksar bahaar aai hai

har taraf apne hī apne haa.e tanhā.ī na pūchh

kis qadar khaltī hai aksar ham ko bīnā.ī na pūchh

har taraf apne hi apne hae tanhai na puchh

kis qadar khalti hai aksar hum ko binai na puchh

hameñ kam-baḳht ehsās-e-ḳhudī us dar pe le baiThā

ham uTh jaate to vo parda bhī uTh jaatā jo haa.il thā

hamein kam-baKHt ehsas-e-KHudi us dar pe le baiTha

hum uTh jate to wo parda bhi uTh jata jo hail tha

auroñ kī aag kyā tujhe kundan banā.egī

apnī bhī aag meñ kabhī chup-chāp jal ke dekh

auron ki aag kya tujhe kundan banaegi

apni bhi aag mein kabhi chup-chap jal ke dekh

dushman-e-dil hī nahīñ dushman-e-jāñ hotā hai

uf vo ehsās jo piirī meñ javāñ hotā hai

dushman-e-dil hi nahin dushman-e-jaan hota hai

uf wo ehsas jo piri mein jawan hota hai

ġham se ehsās kā ā.īna jilā paatā hai

aur ġham sīkhe hai aa kar ye salīqa mujh se

gham se ehsas ka aaina jila pata hai

aur gham sikhe hai aa kar ye saliqa mujh se