کس نے وفا کے نام پہ دھوکا دیا مجھے

کس سے کہوں کہ میرا گنہ گار کون ہے

موت سے زیست کی تکمیل نہیں ہو سکتی

روشنی خاک میں تحلیل نہیں ہو سکتی

زمیں پہ پاؤں ذرا احتیاط سے دھرنا

اکھڑ گئے تو قدم پھر کہاں سنبھلتے ہیں

زندگی بھر کی کمائی یہ تعلق ہی تو ہے

کچھ بچے یا نہ بچے اس کو بچا رکھتے ہیں

وہی رشتے وہی ناطے وہی غم

بدن سے روح تک اکتا گئی تھی

اک تری یاد گلے ایسے پڑی ہے کہ نجیبؔ

آج کا کام بھی ہم کل پہ اٹھا رکھتے ہیں

پھر یوں ہوا کہ مجھ پہ ہی دیوار گر پڑی

لیکن نہ کھل سکا پس دیوار کون ہے

آسمانوں سے زمینوں پہ جواب آئے گا

ایک دن رات ڈھلے یوم حساب آئے گا

نجیبؔ اک وہم تھا دو چار دن کا ساتھ ہے لیکن

ترے غم سے تو ساری عمر کا رشتہ نکل آیا

مری زمیں مجھے آغوش میں سمیٹ بھی لے

نہ آسماں کا رہوں میں نہ آسماں میرا

ہم تو سمجھے تھے کہ چاروں در مقفل ہو چکے

کیا خبر تھی ایک دروازہ کھلا رہ جائے گا

خیمۂ جاں کی طنابوں کو اکھڑ جانا تھا

ہم سے اک روز ترا غم بھی بچھڑ جانا تھا

مری نمود کسی جسم کی تلاش میں ہے

میں روشنی ہوں اندھیروں میں چل رہا ہوں ابھی

اس دائرۂ روشنی و رنگ سے آگے

کیا جانیے کس حال میں بستی کے مکیں ہیں

رکوں تو حجلۂ منزل پکارتا ہے مجھے

قدم اٹھاؤں تو رستہ نظر نہیں آتا