ḳhudī ko kar buland itnā ki har taqdīr se pahle

ḳhudā bande se ḳhud pūchhe batā terī razā kyā hai

KHudi ko kar buland itna ki har taqdir se pahle

KHuda bande se KHud puchhe bata teri raza kya hai

maanā ki terī diid ke qābil nahīñ huuñ maiñ

tū merā shauq dekh mirā intizār dekh

mana ki teri did ke qabil nahin hun main

tu mera shauq dekh mera intizar dekh

sitāroñ se aage jahāñ aur bhī haiñ

abhī ishq ke imtihāñ aur bhī haiñ

sitaron se aage jahan aur bhi hain

abhi ishq ke imtihan aur bhi hain

tire ishq kī intihā chāhtā huuñ

mirī sādgī dekh kyā chāhtā huuñ

tere ishq ki intiha chahta hun

meri sadgi dekh kya chahta hun

tū shāhīñ hai parvāz hai kaam terā

tire sāmne āsmāñ aur bhī haiñ

tu shahin hai parwaz hai kaam tera

tere samne aasman aur bhi hain

duniyā kī mahfiloñ se uktā gayā huuñ yā rab

kyā lutf anjuman kā jab dil hī bujh gayā ho

duniya ki mahfilon se ukta gaya hun ya rab

kya lutf anjuman ka jab dil hi bujh gaya ho

nasha pilā ke girānā to sab ko aatā hai

mazā to tab hai ki girtoñ ko thaam le saaqī

nasha pila ke girana to sab ko aata hai

maza to tab hai ki girton ko tham le saqi

faqat nigāh se hotā hai faisla dil kā

na ho nigāh meñ shoḳhī to dilbarī kyā hai

faqat nigah se hota hai faisla dil ka

na ho nigah mein shoKHi to dilbari kya hai

hazāroñ saal nargis apnī be-nūrī pe rotī hai

baḌī mushkil se hotā hai chaman meñ dīda-var paidā

hazaron sal nargis apni be-nuri pe roti hai

baDi mushkil se hota hai chaman mein dida-war paida

apne man meñ Duub kar pā jā surāġh-e-zindagī

tū agar merā nahīñ bantā na ban apnā to ban

apne man mein Dub kar pa ja suragh-e-zindagi

tu agar mera nahin banta na ban apna to ban

ilm meñ bhī surūr hai lekin

ye vo jannat hai jis meñ huur nahīñ

ilm mein bhi surur hai lekin

ye wo jannat hai jis mein hur nahin

dil se jo baat nikaltī hai asar rakhtī hai

par nahīñ tāqat-e-parvāz magar rakhtī hai

dil se jo baat nikalti hai asar rakhti hai

par nahin taqat-e-parwaz magar rakhti hai

hayā nahīñ hai zamāne kī aañkh meñ baaqī

ḳhudā kare ki javānī tirī rahe be-dāġh

haya nahin hai zamane ki aankh mein baqi

KHuda kare ki jawani teri rahe be-dagh

achchhā hai dil ke saath rahe pāsbān-e-aql

lekin kabhī kabhī ise tanhā bhī chhoḌ de

achchha hai dil ke sath rahe pasban-e-aql

lekin kabhi kabhi ise tanha bhi chhoD de

nahīñ terā nasheman qasr-e-sultānī ke gumbad par

tū shāhīñ hai baserā kar pahāḌoñ kī chaTānoñ meñ

nahin tera nasheman qasr-e-sultani ke gumbad par

tu shahin hai basera kar pahaDon ki chaTanon mein

haram-e-pāk bhī allāh bhī qur.ān bhī ek

kuchh baḌī baat thī hote jo musalmān bhī ek

haram-e-pak bhi allah bhi quran bhi ek

kuchh baDi baat thi hote jo musalman bhi ek

ġhulāmī meñ na kaam aatī haiñ shamshīreñ na tadbīreñ

jo ho zauq-e-yaqīñ paidā to kaT jaatī haiñ zanjīreñ

ghulami mein na kaam aati hain shamshiren na tadbiren

jo ho zauq-e-yaqin paida to kaT jati hain zanjiren

masjid to banā dī shab bhar meñ īmāñ kī harārat vāloñ ne

man apnā purānā paapī hai barsoñ meñ namāzī ban na sakā

masjid to bana di shab bhar mein iman ki hararat walon ne

man apna purana papi hai barson mein namazi ban na saka

sau sau umīdeñ bañdhtī hai ik ik nigāh par

mujh ko na aise pyaar se dekhā kare koī

sau sau umiden bandhti hai ek ek nigah par

mujh ko na aise pyar se dekha kare koi

ai tā.ir-e-lāhautī us rizq se maut achchhī

jis rizq se aatī ho parvāz meñ kotāhī

ai tair-e-lahauti us rizq se maut achchhi

jis rizq se aati ho parwaz mein kotahi

uqābī ruuh jab bedār hotī hai javānoñ meñ

nazar aatī hai un ko apnī manzil āsmānoñ meñ

uqabi ruh jab bedar hoti hai jawanon mein

nazar aati hai un ko apni manzil aasmanon mein

na samjhoge to miT jāoge ai hindostāñ vaalo

tumhārī dāstāñ tak bhī na hogī dāstānoñ meñ

na samjhoge to miT jaoge ai hindostan walo

tumhaari dastan tak bhi na hogi dastanon mein

DhūñDtā phirtā huuñ maiñ 'iqbāl' apne aap ko

aap hī goyā musāfir aap hī manzil huuñ maiñ

DhunDta phirta hun main 'iqbaal' apne aap ko

aap hi goya musafir aap hi manzil hun main

jis khet se dahqāñ ko mayassar nahīñ rozī

us khet ke har ḳhosha-e-gandum ko jalā do

jis khet se dahqan ko mayassar nahin rozi

us khet ke har KHosha-e-gandum ko jala do

yuuñ to sayyad bhī ho mirzā bhī ho afġhān bhī ho

tum sabhī kuchh ho batāo to musalmān bhī ho

yun to sayyad bhi ho mirza bhi ho afghan bhi ho

tum sabhi kuchh ho batao to musalman bhi ho

amal se zindagī bantī hai jannat bhī jahannam bhī

ye ḳhākī apnī fitrat meñ na nuurī hai na naarī hai

amal se zindagi banti hai jannat bhi jahannam bhi

ye KHaki apni fitrat mein na nuri hai na nari hai

tamannā dard-e-dil kī ho to kar ḳhidmat faqīroñ kī

nahīñ miltā ye gauhar bādshāhoñ ke ḳhazīnoñ meñ

tamanna dard-e-dil ki ho to kar KHidmat faqiron ki

nahin milta ye gauhar baadshahon ke KHazinon mein

ishq bhī ho hijāb meñ husn bhī ho hijāb meñ

yā to ḳhud āshkār ho yā mujhe āshkār kar

ishq bhi ho hijab mein husn bhi ho hijab mein

ya to KHud aashkar ho ya mujhe aashkar kar

saare jahāñ se achchhā hindostāñ hamārā

ham bulbuleñ haiñ is kī ye gulsitāñ hamārā

sare jahan se achchha hindostan hamara

hum bulbulen hain is ki ye gulsitan hamara

tire āzād bandoñ kī na ye duniyā na vo duniyā

yahāñ marne kī pābandī vahāñ jiine kī pābandī

tere aazad bandon ki na ye duniya na wo duniya

yahan marne ki pabandi wahan jine ki pabandi

jamhūriyat ik tarz-e-hukūmat hai ki jis meñ

bandoñ ko ginā karte haiñ taulā nahīñ karte

jamhuriyat ek tarz-e-hukumat hai ki jis mein

bandon ko gina karte hain taula nahin karte

nahīñ hai nā-umīd 'iqbāl' apnī kisht-e-vīrāñ se

zarā nam ho to ye miTTī bahut zarḳhez hai saaqī

nahin hai na-umid 'iqbaal' apni kisht-e-viran se

zara nam ho to ye miTTi bahut zarKHez hai saqi

bātil se dabne vaale ai āsmāñ nahīñ ham

sau baar kar chukā hai tū imtihāñ hamārā

baatil se dabne wale ai aasman nahin hum

sau bar kar chuka hai tu imtihan hamara

vatan kī fikr kar nādāñ musībat aane vaalī hai

tirī barbādiyoñ ke mashvare haiñ āsmānoñ meñ

watan ki fikr kar nadan musibat aane wali hai

teri barbaadiyon ke mashware hain aasmanon mein

aql ko tanqīd se fursat nahīñ

ishq par a.amāl kī buniyād rakh

aql ko tanqid se fursat nahin

ishq par aamal ki buniyaad rakh

butoñ se tujh ko umīdeñ ḳhudā se naumīdī

mujhe batā to sahī aur kāfirī kyā hai

buton se tujh ko umiden KHuda se naumidi

mujhe bata to sahi aur kafiri kya hai

yaqīñ mohkam amal paiham mohabbat fātah-e-ālam

jihād-e-zindagānī meñ haiñ ye mardoñ kī shamshīreñ

yaqin mohkam amal paiham mohabbat fatah-e-alam

jihad-e-zindagani mein hain ye mardon ki shamshiren

bharī bazm meñ raaz kī baat kah dī

baḌā be-adab huuñ sazā chāhtā huuñ

bhari bazm mein raaz ki baat kah di

baDa be-adab hun saza chahta hun

anokhī vaz.a hai saare zamāne se nirāle haiñ

ye āshiq kaun sī bastī ke yā-rab rahne vaale haiñ

anokhi waza hai sare zamane se nirale hain

ye aashiq kaun si basti ke ya-rab rahne wale hain

bāġh-e-bahisht se mujhe hukm-e-safar diyā thā kyuuñ

kār-e-jahāñ darāz hai ab mirā intizār kar

bagh-e-bahisht se mujhe hukm-e-safar diya tha kyun

kar-e-jahan daraaz hai ab mera intizar kar

hai raam ke vajūd pe hindostāñ ko naaz

ahl-e-nazar samajhte haiñ us ko imām-e-hind

hai ram ke wajud pe hindostan ko naz

ahl-e-nazar samajhte hain us ko imam-e-hind

tū ne ye kyā ġhazab kiyā mujh ko bhī faash kar diyā

maiñ hī to ek raaz thā sīna-e-kā.enāt meñ

tu ne ye kya ghazab kiya mujh ko bhi fash kar diya

main hi to ek raaz tha sina-e-kaenat mein

saudā-garī nahīñ ye ibādat ḳhudā kī hai

ai be-ḳhabar jazā kī tamannā bhī chhoḌ de

sauda-gari nahin ye ibaadat KHuda ki hai

ai be-KHabar jaza ki tamanna bhi chhoD de

andāz-e-bayāñ garche bahut shoḳh nahīñ hai

shāyad ki utar jaa.e tire dil meñ mirī baat

andaz-e-bayan garche bahut shoKH nahin hai

shayad ki utar jae tere dil mein meri baat

mujhe rokegā tū ai nāḳhudā kyā ġharq hone se

ki jin ko Dūbnā hai Duub jaate haiñ safīnoñ meñ

mujhe rokega tu ai naKHuda kya gharq hone se

ki jin ko Dubna hai Dub jate hain safinon mein

kabhī ham se kabhī ġhairoñ se shanāsā.ī hai

baat kahne kī nahīñ tū bhī to harjā.ī hai

kabhi hum se kabhi ghairon se shanasai hai

baat kahne ki nahin tu bhi to harjai hai

maz.hab nahīñ sikhātā aapas meñ bair rakhnā

hindī haiñ ham vatan hai hindostāñ hamārā

mazhab nahin sikhata aapas mein bair rakhna

hindi hain hum watan hai hindostan hamara

na pūchho mujh se lazzat ḳhānamāñ-barbād rahne kī

nasheman saikḌoñ maiñ ne banā kar phūñk Daale haiñ

na puchho mujh se lazzat KHanaman-barbaad rahne ki

nasheman saikDon main ne bana kar phunk Dale hain

ye jannat mubārak rahe zāhidoñ ko

ki maiñ aap kā sāmnā chāhtā huuñ

ye jannat mubarak rahe zahidon ko

ki main aap ka samna chahta hun

terā imaam be-huzūr terī namāz be-surūr

aisī namāz se guzar aise imaam se guzar

tera imam be-huzur teri namaz be-surur

aisi namaz se guzar aise imam se guzar