Sher on Teacher

maañ baap aur ustād sab haiñ ḳhudā kī rahmat

hai rok-Tok un kī haq meñ tumhāre ne.amat

man bap aur ustad sab hain KHuda ki rahmat

hai rok-Tok un ki haq mein tumhaare neamat

jin ke kirdār se aatī ho sadāqat kī mahak

un kī tadrīs se patthar bhī pighal sakte haiñ

jin ke kirdar se aati ho sadaqat ki mahak

un ki tadris se patthar bhi pighal sakte hain

shāgird haiñ ham 'mīr' se ustād ke 'rāsiḳh'

ustādoñ kā ustād hai ustād hamārā

shagird hain hum 'mir' se ustad ke 'rasiKH'

ustadon ka ustad hai ustad hamara

adab ta.alīm kā jauhar hai zevar hai javānī kā

vahī shāgird haiñ jo ḳhidmat-e-ustād karte haiñ

adab talim ka jauhar hai zewar hai jawani ka

wahi shagird hain jo KHidmat-e-ustad karte hain

dekhā na kohkan koī farhād ke baġhair

aatā nahīñ hai fan koī ustād ke baġhair

dekha na kohkan koi farhad ke baghair

aata nahin hai fan koi ustad ke baghair

vahī shāgird phir ho jaate haiñ ustād ai 'jauhar'

jo apne jān-o-dil se ḳhidmat-e-ustād karte haiñ

wahi shagird phir ho jate hain ustad ai 'jauhar'

jo apne jaan-o-dil se KHidmat-e-ustad karte hain

rahbar bhī ye hamdam bhī ye ġham-ḳhvār hamāre

ustād ye qaumoñ ke haiñ me.amār hamāre

rahbar bhi ye hamdam bhi ye gham-KHwar hamare

ustad ye qaumon ke hain meamar hamare

ab mujhe māneñ na māneñ ai 'hafīz'

mānte haiñ sab mire ustād ko

ab mujhe manen na manen ai 'hafiz'

mante hain sab mere ustad ko

ustād ke ehsān kā kar shukr 'munīr' aaj

kī ahl-e-suḳhan ne tirī tārīf baḌī baat

ustad ke ehsan ka kar shukr 'munir' aaj

ki ahl-e-suKHan ne teri tarif baDi baat

madrasa merā merī zaat meñ hai

ḳhud moallim huuñ ḳhud kitāb huuñ maiñ

madrasa mera meri zat mein hai

KHud moallim hun KHud kitab hun main

mahrūm huuñ maiñ ḳhidmat-e-ustād se 'munīr'

kalkatta mujh ko gor se bhī tañg ho gayā

mahrum hun main KHidmat-e-ustad se 'munir'

kalkatta mujh ko gor se bhi tang ho gaya

falsafe saare kitāboñ meñ ulajh kar rah ga.e

dars-gāhoñ meñ nisāboñ kī thakan baaqī rahī

falsafe sare kitabon mein ulajh kar rah gae

dars-gahon mein nisabon ki thakan baqi rahi

kis tarah 'amānat' na rahūñ ġham se maiñ dil-gīr

āñkhoñ meñ phirā kartī hai ustād kī sūrat

kis tarah 'amanat' na rahun gham se main dil-gir

aankhon mein phira karti hai ustad ki surat

mujh se jo chāhiye vo dars-e-basīrat liije

maiñ ḳhud āvāz huuñ merī koī āvāz nahīñ

mujh se jo chahiye wo dars-e-basirat lije

main KHud aawaz hun meri koi aawaz nahin

ye fann-e-ishq hai aave use tīnat meñ jis kī ho

tū zāhid pīr-e-nā-bāliġh hai be-tah tujh ko kyā aave

ye fann-e-ishq hai aawe use tinat mein jis ki ho

tu zahid pir-e-na-baaligh hai be-tah tujh ko kya aawe

ahl-e-bīnash ko hai tūfān-e-havādis maktab

lutma-e-mauj kam az saili-e-ustād nahīñ

ahl-e-binash ko hai tufan-e-hawadis maktab

lutma-e-mauj kam az saili-e-ustad nahin

sach ye hai ham hī mohabbat kā sabaq paḌh na sake

varna an-paḌh to na the ham ko paḌhāne vaale

sach ye hai hum hi mohabbat ka sabaq paDh na sake

warna an-paDh to na the hum ko paDhane wale

paḌhne vaalā bhī to kartā hai kisī se mansūb

sabhī kirdār kahānī ke nahīñ hote haiñ

paDhne wala bhi to karta hai kisi se mansub

sabhi kirdar kahani ke nahin hote hain

hai aur ilm o adab maktab-e-mohabbat meñ

ki hai vahāñ kā moallim judā adiib judā

hai aur ilm o adab maktab-e-mohabbat mein

ki hai wahan ka moallim juda adib juda

asātiza ne mirā haath thaam rakkhā hai

isī liye to maiñ pahuñchā huuñ apnī manzil par

asatiza ne mera hath tham rakkha hai

isi liye to main pahuncha hun apni manzil par

shāgird tarz-e-ḳhanda-zanī meñ hai gul tirā

ustād-e-andalīb haiñ soz-o-fuġhāñ meñ ham

shagird tarz-e-KHanda-zani mein hai gul tera

ustad-e-andalib hain soz-o-fughan mein hum