Sher on Injustice

ham amn chāhte haiñ magar zulm ke ḳhilāf

gar jañg lāzmī hai to phir jañg hī sahī

hum amn chahte hain magar zulm ke KHilaf

gar jang lazmi hai to phir jang hi sahi

zulm sahnā bhī to zālim kī himāyat Thahrā

ḳhāmushī bhī to huī pusht-panāhī kī tarah

zulm sahna bhi to zalim ki himayat Thahra

KHamushi bhi to hui pusht-panahi ki tarah

kuchh na kahne se bhī chhin jaatā hai ejāz-e-suḳhan

zulm sahne se bhī zālim kī madad hotī hai

kuchh na kahne se bhi chhin jata hai ejaz-e-suKHan

zulm sahne se bhi zalim ki madad hoti hai

ai zulm ke maato lab kholo chup rahne vaalo chup kab tak

kuchh hashr to un se uTThegā kuchh duur to naale jā.eñge

ai zulm ke mato lab kholo chup rahne walo chup kab tak

kuchh hashr to un se uTThega kuchh dur to nale jaenge

hazāroñ zulm hoñ mazlūm par to chup rahe duniyā

agar mazlūm kuchh bole to dahshat-gard kahtī hai

hazaron zulm hon mazlum par to chup rahe duniya

agar mazlum kuchh bole to dahshat-gard kahti hai

kuchh zulm o sitam sahne kī aadat bhī hai ham ko

kuchh ye hai ki darbār meñ sunvā.ī bhī kam hai

kuchh zulm o sitam sahne ki aadat bhi hai hum ko

kuchh ye hai ki darbar mein sunwai bhi kam hai

jaane kyā kyā zulm parinde dekh ke aate haiñ

shaam Dhale peḌoñ par marsiya-ḳhvānī hotī hai

jaane kya kya zulm parinde dekh ke aate hain

sham Dhale peDon par marsiya-KHwani hoti hai

zulm par zulm aa ga.e ġhālib

aable ābloñ ko chhoḌ ga.e

zulm par zulm aa gae ghaalib

aable aablon ko chhoD gae

asīrān-e-qafas par zulm to sayyād karte haiñ

ki un ke par katar lete haiñ tab āzād karte haiñ

asiran-e-qafas par zulm to sayyaad karte hain

ki un ke par katar lete hain tab aazad karte hain