Sher on Aabla

abhī se paañv ke chhāle na dekho

abhī yaaro safar kī ibtidā hai

abhi se panw ke chhaale na dekho

abhi yaro safar ki ibtida hai

donoñ kā milnā mushkil hai donoñ haiñ majbūr bahut

us ke paañv meñ mehñdī lagī hai mere paañv meñ chhāle haiñ

donon ka milna mushkil hai donon hain majbur bahut

us ke panw mein mehndi lagi hai mere panw mein chhaale hain

jin ke hoñToñ pe hañsī paañv meñ chhāle hoñge

haañ vahī log tumheñ chāhne vaale hoñge

jin ke honTon pe hansi panw mein chhaale honge

han wahi log tumhein chahne wale honge

ābla-pā koī is dasht meñ aayā hogā

varna āñdhī meñ diyā kis ne jalāyā hogā

aabla-pa koi is dasht mein aaya hoga

warna aandhi mein diya kis ne jalaya hoga

shikva-e-ābla abhī se 'mīr'

hai piyāre hanūz dillī duur

shikwa-e-abla abhi se 'mir'

hai piyare hanuz dilli dur

ḳhush haiñ to phir musāfir-e-duniyā nahīñ haiñ aap

is dasht meñ bas ābla-pā.ī hai roiye

KHush hain to phir musafir-e-duniya nahin hain aap

is dasht mein bas aabla-pai hai roiye

safar meñ har qadam rah rah ke ye taklīf hī dete

bahar-sūrat hameñ in ābloñ ko phoḌ denā thā

safar mein har qadam rah rah ke ye taklif hi dete

bahar-surat hamein in aablon ko phoD dena tha

maiñ sar-ba-sajda sakūñ meñ nahīñ safar meñ huuñ

jabīñ pe daaġh nahīñ aabla banā huā hai

main sar-ba-sajda sakun mein nahin safar mein hun

jabin pe dagh nahin aabla bana hua hai

ai mire paañv ke chhālo mire ham-rāh raho

imtihāñ saḳht hai tum chhoḌ ke jaate kyuuñ ho

ai mere panw ke chhaalo mere ham-rah raho

imtihan saKHt hai tum chhoD ke jate kyun ho

rāsta paanī māñgtā hai

apne paañv kā chhālā maar

rasta pani mangta hai

apne panw ka chhaala mar

kāñToñ kī zabāñ suukh ga.ī pyaas se yā rab

ik ābla-pā vādi-e-pur-ḳhār meñ aave

kanTon ki zaban sukh gai pyas se ya rab

ek aabla-pa wadi-e-pur-KHar mein aawe

mujhe yaqīñ to bahut thā magar ġhalat niklā

ki aabla kabhī pā-posh meñ nahīñ aatā

mujhe yaqin to bahut tha magar ghalat nikla

ki aabla kabhi pa-posh mein nahin aata

zulm par zulm aa ga.e ġhālib

aable ābloñ ko chhoḌ ga.e

zulm par zulm aa gae ghaalib

aable aablon ko chhoD gae

aao taqrīb-e-rū-numā.ī kareñ

paañv meñ ek aabla huā hai

aao taqrib-e-ru-numai karen

panw mein ek aabla hua hai

tez rakhiyo sar-e-har-ḳhār ko ai dasht-e-junūñ

shāyad aa jaa.e koī ābla-pā mere ba.ad

tez rakhiyo sar-e-har-KHar ko ai dasht-e-junun

shayad aa jae koi aabla-pa mere baad

ik aabla thā so bhī gayā ḳhār-e-ġham se phaT

terī girah meñ kyā dil-e-andoh-gīñ rahā

ek aabla tha so bhi gaya KHar-e-gham se phaT

teri girah mein kya dil-e-andoh-gin raha

dil ke har juzv meñ judā.ī hai

dard uThe aabla agar baiThe

dil ke har juzw mein judai hai

dard uThe aabla agar baiThe

be-takalluf maqām-e-ulfat hai

daaġh uTThe ki aabla baiThe

be-takalluf maqam-e-ulfat hai

dagh uTThe ki aabla baiThe

ḳhaar chubh kar jo TūTtā hai kabhī

aabla phuuT phuuT rotā hai

KHar chubh kar jo TuTta hai kabhi

aabla phuT phuT rota hai

hai jab tak dasht-paimā.ī salāmat

rahegī ābla-pā.ī salāmat

hai jab tak dasht-paimai salamat

rahegi aabla-pai salamat

jab is meñ ḳhuuñ rahā na to ye dil kā aabla

ho ḳhushk jaise dāna-e-añgūr rah gayā

jab is mein KHun raha na to ye dil ka aabla

ho KHushk jaise dana-e-angur rah gaya

ham aabla ban rahe haiñ ham ko

ik jumbish-e-neshtar bahut hai

hum aabla ban rahe hain hum ko

ek jumbish-e-neshtar bahut hai

lagā.ī kis but-e-mai-nosh ne hai taak us par

subū-ba-dosh hai saaqī jo aabla dil kā

lagai kis but-e-mai-nosh ne hai tak us par

subu-ba-dosh hai saqi jo aabla dil ka

jo mujh ātish-nafas ne muñh lagāyā us ko ai saaqī

abhī hone lageñge aable mahsūs shīshe meñ

jo mujh aatish-nafas ne munh lagaya us ko ai saqi

abhi hone lagenge aable mahsus shishe mein

bachegā na kāvish se mizhgāñ kī dil

ki nashtar bahut aabla ek hai

bachega na kawish se mizhgan ki dil

ki nashtar bahut aabla ek hai

ḳhāk-e-sahrā-e-junūñ narm hai resham kī tarah

aabla hai na koī ābla-pā mere ba.ad

KHak-e-sahra-e-junun narm hai resham ki tarah

aabla hai na koi aabla-pa mere baad