عناصر شاعری پر اشعار

زندگی کیا ہے عناصر میں ظہور ترتیب

موت کیا ہے انہیں اجزا کا پریشاں ہونا

کون تحلیل ہوا ہے مجھ میں

منتشر کیوں ہیں عناصر میرے

میں رات سست عناصر سے تنگ آ گیا تھا

مری حیات فسردہ میں رنگ آ گیا تھا

مضمحل ہو گئے قویٰ غالب

وہ عناصر میں اعتدال کہاں

ہیں عناصر کی یہ صورت بازیاں

شعبدے کیا کیا ہیں ان چاروں کے بیچ

موت کی ایک علامت ہے اگر دیکھا جائے

روح کا چار عناصر پہ سواری کرنا

عناصر کی کوئی ترتیب قائم رہ نہیں سکتی

تغیر غیر فانی ہے تغیر جاودانی ہے

ایک ہستی مری عناصر چار

ہر طرف سے گھری سی رہتی ہے

ہر روح پس پردۂ ترتیب عناصر

ناکردہ گناہوں کی سزا کاٹ رہی ہے

اب عناصر میں توازن ڈھونڈنے جائیں کہاں

ہم جسے ہم راز سمجھے پاسباں نکلا ترا

اختلاط اپنے عناصر میں نہیں

جو ہے میرے جسم میں بیگانہ ہے

زمیں نئی تھی عناصر کی خو بدلتی تھی

ہوا سے پہلے جزیرے پہ دھوپ چلتی تھی

عناصر کی گھنی زنجیر ہے

سو یہ ہستی کی اک تعبیر ہے