dil meñ ik dard uThā āñkhoñ meñ aañsū bhar aa.e

baiThe baiThe hameñ kyā jāniye kyā yaad aayā

dil mein ek dard uTha aankhon mein aansu bhar aae

baiThe baiThe hamein kya jaaniye kya yaad aaya

baaqī rahe na farq zamīn āsmān meñ

apnā qadam uThā leñ agar darmiyāñ se ham

baqi rahe na farq zamin aasman mein

apna qadam uTha len agar darmiyan se hum

baat bhī aap ke aage na zabāñ se niklī

lījiye aa.e the ham soch ke kyā kyā dil meñ

baat bhi aap ke aage na zaban se nikli

lijiye aae the hum soch ke kya kya dil mein

aap hī apne zarā jaur-o-sitam ko dekheñ

ham agar arz kareñge to shikāyat hogī

aap hi apne zara jaur-o-sitam ko dekhen

hum agar arz karenge to shikayat hogi

kahte haiñ mere dost mirā haal dekh kar

dushman ko bhī ḳhudā na kare mubtalā-e-ishq

kahte hain mere dost mera haal dekh kar

dushman ko bhi KHuda na kare mubtala-e-ishq

na kareñ aap vafā ham ko kyā

bevafā aap hī kahlā.iyegā

na karen aap wafa hum ko kya

bewafa aap hi kahlaiyega

aadam se bāġh-e-ḳhuld chhuTā ham se kū-e-yār

vo ibtidā-e-rañj hai ye intihā-e-rañj

aadam se bagh-e-KHuld chhuTa hum se ku-e-yar

wo ibtida-e-ranj hai ye intiha-e-ranj

qaid-e-maz.hab vāqa.ī ik rog hai

aadmī ko chāhiye āzād ho

qaid-e-mazhab waqai ek rog hai

aadmi ko chahiye aazad ho

itnī to dīd-e-ishq kī tāsīr dekhiye

jis samt dekhiye tirī tasvīr dekhiye

itni to did-e-ishq ki tasir dekhiye

jis samt dekhiye teri taswir dekhiye

kaleja kāñptā hai dekh kar is sard-mehrī ko

tumhāre ghar meñ kyā aa.e ki ham kashmīr meñ aa.e

kaleja kanpta hai dekh kar is sard-mehri ko

tumhaare ghar mein kya aae ki hum kashmir mein aae

mere baġhal meñ rah ke mujhī ko kiyā zalīl

nafrat sī ho ga.ī dil-e-ḳhāna-ḳharāb se

mere baghal mein rah ke mujhi ko kiya zalil

nafrat si ho gai dil-e-KHana-KHarab se

tirchhī nazroñ se na dekho āshiq-e-dil-gīr ko

kaise tīr-andāz ho sīdhā to kar lo tiir ko

tirchhi nazron se na dekho aashiq-e-dil-gir ko

kaise tir-andaz ho sidha to kar lo tir ko

tirī talāsh meñ mah kī tarah maiñ phirtā huuñ

kahāñ tū raat ko ai āftāb rahtā hai

teri talash mein mah ki tarah main phirta hun

kahan tu raat ko ai aaftab rahta hai

ka.aba banā.iye ki kalīsā banā.iye

dil sā makāñ havāle kiyā hai janāb ke

kaba banaiye ki kalisa banaiye

dil sa makan hawale kiya hai janab ke

haiñ vo suufī jo kabhī nālā-e-nāqūs sunā

vajd karne lage ham dil kā ajab haal huā

hain wo sufi jo kabhi nala-e-naqus suna

wajd karne lage hum dil ka ajab haal hua

huā dhuup meñ bhī na kam husn-e-yār

kanhayyā banā vo jo sañvlā gayā

hua dhup mein bhi na kam husn-e-yar

kanhayya bana wo jo sanwla gaya

roz o shab furqat-e-jānāñ meñ basar kī ham ne

tujh se kuchh kaam na ai gardish-e-daurāñ niklā

roz o shab furqat-e-jaanan mein basar ki hum ne

tujh se kuchh kaam na ai gardish-e-dauran nikla

na paḌhā yaar ne ahvāl-e-shikasta merā

ḳhat ke purze kiye bāzū-e-kabūtar toḌā

na paDha yar ne ahwal-e-shikasta mera

KHat ke purze kiye bazu-e-kabutar toDa

sākin-e-dair huuñ ik but kā huuñ banda ba-ḳhudā

ḳhud vo kāfir haiñ jo kahte haiñ musalmāñ mujh ko

sakin-e-dair hun ek but ka hun banda ba-KHuda

KHud wo kafir hain jo kahte hain musalman mujh ko

ka.abe kī samt sajda kiyā dil ko chhoḌ kar

to kis taraf thā dhyān hamārā kidhar gayā

kabe ki samt sajda kiya dil ko chhoD kar

to kis taraf tha dhyan hamara kidhar gaya

ulfat-e-kūcha-e-jānāñ ne kiyā ḳhāna-ḳharāb

barhaman dair se ka.abe se musalmāñ niklā

ulfat-e-kucha-e-jaanan ne kiya KHana-KHarab

barhaman dair se kabe se musalman nikla

āshiq haiñ ham ko harf-e-mohabbat se kaam hai

mullā nikāltā phire matlab kitāb se

aashiq hain hum ko harf-e-mohabbat se kaam hai

mulla nikalta phire matlab kitab se

mai pī ke iid kījiye guzrā mah-e-siyām

tasbīh rakhiye sāġhar-o-mīnā uThā.iye

mai pi ke id kijiye guzra mah-e-siyam

tasbih rakhiye saghar-o-mina uThaiye

ham riñd-e-pareshāñ haiñ māh-e-ramazāñ hai

chamkī huī in rozoñ meñ vaa.iz kī dukāñ hai

hum rind-e-pareshan hain mah-e-ramazan hai

chamki hui in rozon mein waiz ki dukan hai

tumhārī zulf na girdāb-e-nāf tak pahuñchī

huī na chashma-e-haivāñ se faiz-yāb ghaTā

tumhaari zulf na girdab-e-naf tak pahunchi

hui na chashma-e-haiwan se faiz-yab ghaTa

aap ko ġhair bahut dekhte haiñ

ek din dekhiye pachhtā.iyegā

aap ko ghair bahut dekhte hain

ek din dekhiye pachhtaiyega

paayā hai is qadar suḳhan-e-saḳht ne rivāj

punjabi baat karte haiñ pashtū zabān meñ

paya hai is qadar suKHan-e-saKHt ne riwaj

punjabi baat karte hain pashtu zaban mein

majnūñ nahīñ ki ek hī lailā ke ho raheñ

rahtā hai apne saath nayā ik nigār roz

majnun nahin ki ek hi laila ke ho rahen

rahta hai apne sath naya ek nigar roz

ḳhaak meñ mujh ko milā ke vo sanam kahtā hai

apne allāh se jā kar mirī fariyād karo

KHak mein mujh ko mila ke wo sanam kahta hai

apne allah se ja kar meri fariyaad karo

donoñ chashmoñ se marī ashk bahā karte haiñ

maujzan rahtā hai dariyā ke kināre dariyā

donon chashmon se mari ashk baha karte hain

maujzan rahta hai dariya ke kinare dariya

ḳhud-raftagī hai chashm-e-haqīqat jo vā huī

darvāza khul gayā to maiñ ghar se nikal gayā

KHud-raftagi hai chashm-e-haqiqat jo wa hui

darwaza khul gaya to main ghar se nikal gaya

jab maiñ rotā huuñ to allāh re hañsnā un kā

qahqahoñ meñ mire nāloñ ko uḌā dete haiñ

jab main rota hun to allah re hansna un ka

qahqahon mein mere nalon ko uDa dete hain

tū apne paañv kī mehñdī chhuḌā ke de ai mahr

falak ko chāhiye ġhāza ruḳh-e-qamar ke liye

tu apne panw ki mehndi chhuDa ke de ai mahr

falak ko chahiye ghaza ruKH-e-qamar ke liye

ham bhī zarūr kahte kisī kaam ke liye

fursat na āsmāñ ko milī apne kaam se

hum bhi zarur kahte kisi kaam ke liye

fursat na aasman ko mili apne kaam se

kyā banāyā hai butoñ ne mujh ko

naam rakkhā hai musalmāñ merā

kya banaya hai buton ne mujh ko

nam rakkha hai musalman mera

dekhiye aaj vo tashrīf kahāñ farmā.eñ

ham se va.ada hai judā ġhair se iqrār judā

dekhiye aaj wo tashrif kahan farmaen

hum se wada hai juda ghair se iqrar juda

chaar unsur ke sab tamāshe haiñ

vaah ye chaar baaġh kis kā hai

chaar unsur ke sab tamashe hain

wah ye chaar bagh kis ka hai

dasht-e-junūñ meñ aa ga.iiñ āñkheñ jo un kī yaad

bhāgā meñ ḳhaak Daal ke chashm-e-ġhazāl meñ

dasht-e-junun mein aa gain aankhen jo un ki yaad

bhaga mein KHak Dal ke chashm-e-ghazal mein

fasl-e-gul hī zāhidoñ ko ġham hī mai-kash shaad haiñ

masjideñ suunī paḌī haiñ bhTTiyāñ ābād haiñ

fasl-e-gul hi zahidon ko gham hi mai-kash shad hain

masjiden suni paDi hain bhTTiyan aabaad hain

kudūrat nahīñ apnī tab-e-ravāñ meñ

bahut saaf bahtā hai dariyā hamārā

kudurat nahin apni tab-e-rawan mein

bahut saf bahta hai dariya hamara

yād-e-mizhgāñ meñ mirī aañkh lagī jaatī hai

log sach kahte haiñ suulī pe bhī niiñd aatī hai

yaad-e-mizhgan mein meri aankh lagi jati hai

log sach kahte hain suli pe bhi nind aati hai

mere ash.ār se mazmūn-e-ruḳh-e-yār khulā

be-ahādīs nahīñ matlab-e-qur.ān niklā

mere ashaar se mazmun-e-ruKH-e-yar khula

be-ahadis nahin matlab-e-quran nikla

sāqiyā ab ke baḌe zoroñ pe haiñ ham mai-parast

chal ke vaa.iz ko sar-e-mimbar latāḌā chāhiye

saqiya ab ke baDe zoron pe hain hum mai-parast

chal ke waiz ko sar-e-mimbar lataDa chahiye

saaf qulqul se sadā aatī hai āmīn āmīn

apne saaqī ko jo ham riñd duā dete haiñ

saf qulqul se sada aati hai aamin aamin

apne saqi ko jo hum rind dua dete hain

chashm vā rah ga.ī dekhā jo tilismāt-e-jahāñ

aa.ina ban ga.e ham mahv-e-tamāshā ho kar

chashm wa rah gai dekha jo tilismat-e-jahan

aaina ban gae hum mahw-e-tamasha ho kar

uThā dī qaid-e-maz.hab dil se ham ne

qafas se tā.ir-e-idrāk niklā

uTha di qaid-e-mazhab dil se hum ne

qafas se tair-e-idrak nikla

ma.adūm hue jaate haiñ ham fikr ke maare

mazmūñ kamar-e-yār kā paidā nahīñ hotā

madum hue jate hain hum fikr ke mare

mazmun kamar-e-yar ka paida nahin hota

tā.ir-e-aql ko ma.azūr kahā zāhid ne

par-e-parvāz meñ tasbīh kā Dorā bāñdhā

tair-e-aql ko mazur kaha zahid ne

par-e-parwaz mein tasbih ka Dora bandha

jab us be-mehr ko ai jazb-e-dil kuchh josh aatā hai

mah-e-nau kī tarah khole hue āġhosh aatā hai

jab us be-mehr ko ai jazb-e-dil kuchh josh aata hai

mah-e-nau ki tarah khole hue aaghosh aata hai

nahīñ hai hājiyoñ ko mai-kashī kī kaifiyyat

ga.e haram ko to hogī bahut ḳharāb ghaTā

nahin hai hajiyon ko mai-kashi ki kaifiyyat

gae haram ko to hogi bahut KHarab ghaTa