بے خبری پر اشعار

خبر تحیر عشق سن نہ جنوں رہا نہ پری رہی

نہ تو تو رہا نہ تو میں رہا جو رہی سو بے خبری رہی

ہو محبت کی خبر کچھ تو خبر پھر کیوں ہو

یہ بھی اک بے خبری ہے کہ خبر رکھتے ہیں

اسرار اگر سمجھے دنیا کی ہر اک شے کے

خود اپنی حقیقت سے یہ بے خبری کیوں ہے

ہوشمندی سے جہاں بات نہ بنتی ہو سحرؔ

کام ایسے میں بہت بے خبری آتی ہے

خبر کے موڑ پہ سنگ نشاں تھی بے خبری

ٹھکانے آئے مرے ہوش یا ٹھکانے لگے

کچھ کمایا نہیں بازار خبر میں رہ کر

بند دکان کریں بے خبری پیشہ کریں

سہو اور سکر میں رہتے ہیں تبھی تو فقرا

کیونکہ عالم ہے عجب بے خبری کا عالم