خاموش زندگی جو بسر کر رہے ہیں ہم

گہرے سمندروں میں سفر کر رہے ہیں ہم

صرف تاریخ کی رفتار بدل جائے گی

نئی تاریخ کے وارث یہی انساں ہوں گے

ہم اپنی زندگی تو بسر کر چکے رئیسؔ

یہ کس کی زیست ہے جو بسر کر رہے ہیں ہم

آدمی کی تلاش میں ہے خدا

آدمی کو خدا نہیں ملتا

پہلے یہ شکر کہ ہم حد ادب سے نہ بڑھے

اب یہ شکوہ کہ شرافت نے کہیں کا نہ رکھا

کس نے دیکھے ہیں تری روح کے رستے ہوئے زخم

کون اترا ہے ترے قلب کی گہرائی میں

اپنے کو تلاش کر رہا ہوں

اپنی ہی طلب سے ڈر رہا ہوں

ابھی سے شکوۂ پست و بلند ہم سفرو

ابھی تو راہ بہت صاف ہے ابھی کیا ہے

ٹہنی پہ خموش اک پرندہ

ماضی کے الٹ رہا ہے دفتر

پہلے بھی خراب تھی یہ دنیا

اب اور خراب ہو گئی ہے

اب دل کی یہ شکل ہو گئی ہے

جیسے کوئی چیز کھو گئی ہے

دل کئی روز سے دھڑکتا ہے

ہے کسی حادثے کی تیاری

صدیوں تک اہتمام شب ہجر میں رہے

صدیوں سے انتظار سحر کر رہے ہیں ہم

ہم اپنے حال پریشاں پہ بارہا روئے

اور اس کے بعد ہنسی ہم کو بارہا آئی

یہ کربلا ہے نذر بلا ہم ہوئے کہ تم

ناموس قافلہ پہ فدا ہم ہوئے کہ تم

دل سے مت سرسری گزر کہ رئیسؔ

یہ زمیں آسماں سے آتی ہے

چند بے نام و نشاں قبروں کا

میں عزا دار ہوں یا ہے مرا دل