hañsī thamī hai in āñkhoñ meñ yuuñ namī kī tarah

chamak uThe haiñ andhere bhī raushnī kī tarah

hansi thami hai in aankhon mein yun nami ki tarah

chamak uThe hain andhere bhi raushni ki tarah

yuuñ terī rahguzar se dīvāna-vār guzre

kāñdhe pe apne rakh ke apnā mazār guzre

yun teri rahguzar se diwana-war guzre

kandhe pe apne rakh ke apna mazar guzre

ābla-pā koī is dasht meñ aayā hogā

varna āñdhī meñ diyā kis ne jalāyā hogā

aabla-pa koi is dasht mein aaya hoga

warna aandhi mein diya kis ne jalaya hoga

āġhāz to hotā hai anjām nahīñ hotā

jab merī kahānī meñ vo naam nahīñ hotā

aaghaz to hota hai anjam nahin hota

jab meri kahani mein wo nam nahin hota

ye na socho kal kyā ho

kaun kahe is pal kyā ho

ye na socho kal kya ho

kaun kahe is pal kya ho

ayādat hotī jaatī hai ibādat hotī jaatī hai

mire marne kī dekho sab ko aadat hotī jaatī hai

ayaadat hoti jati hai ibaadat hoti jati hai

mere marne ki dekho sab ko aadat hoti jati hai

chāñd tanhā hai āsmāñ tanhā

dil milā hai kahāñ kahāñ tanhā

chand tanha hai aasman tanha

dil mila hai kahan kahan tanha

āñkhoñ ko dekhte hī bole

bin piye koī mad.hosh aayā

aankhon ko dekhte hi bole

bin piye koi madhosh aaya

ayādat ko aa.e shifā ho ga.ī

mirī ruuh tan se judā ho ga.ī

ayaadat ko aae shifa ho gai

meri ruh tan se juda ho gai

kahīñ kahīñ koī taara kahīñ kahīñ jugnū

jo merī raat thī vo aap kā saverā hai

kahin kahin koi tara kahin kahin jugnu

jo meri raat thi wo aap ka sawera hai

jab chāhā iqrār kiyā hai jab chāhā inkār kiyā

dekho ham ne ḳhud hī se ye kaisā anokhā pyaar kiyā

jab chaha iqrar kiya hai jab chaha inkar kiya

dekho hum ne KHud hi se ye kaisa anokha pyar kiya

tere qadmoñ kī aahaT ko ye dil hai DhūñDtā har dam

har ik āvāz par ik thartharāhaT hotī jaatī hai

tere qadmon ki aahaT ko ye dil hai DhunDta har dam

har ek aawaz par ek thartharahaT hoti jati hai

dil toḌ diyā us ne ye kah ke nigāhoñ se

patthar se jo Takrā.e vo jaam nahīñ hotā

dil toD diya us ne ye kah ke nigahon se

patthar se jo Takrae wo jam nahin hota

sham.a huuñ phuul huuñ yā ret pe qadmoñ kā nishāñ

aap ko haq hai mujhe jo bhī jī chāhe kah leñ

shama hun phul hun ya ret pe qadmon ka nishan

aap ko haq hai mujhe jo bhi ji chahe kah len

hañs hañs ke javāñ dil ke ham kyuuñ na chuneñ TukḌe

har shaḳhs kī qismat meñ in.aam nahīñ hotā

hans hans ke jawan dil ke hum kyun na chunen TukDe

har shaKHs ki qismat mein inam nahin hota

an-kahī an-sunī sī kuchh bāteñ

suune din aur ye sunsāñ rāteñ

an-kahi an-suni si kuchh baaten

sune din aur ye sunsan raaten

na koī shahar na rasta na safar

muntashir zehn kī uljhī ghāteñ

na koi shahar na rasta na safar

muntashir zehn ki uljhi ghaten

apnā hī saudā kar baiThe

tum sā jo sabā-farosh aayā

apna hi sauda kar baiThe

tum sa jo saba-farosh aaya

pūchhte ho to suno kaise basar hotī hai

raat ḳhairāt kī sadqe kī sahar hotī hai

puchhte ho to suno kaise basar hoti hai

raat KHairaat ki sadqe ki sahar hoti hai

ab aañkh khulī ab hosh aayā

bahkā sā jab gul-posh aayā

ab aankh khuli ab hosh aaya

bahka sa jab gul-posh aaya

kāñch ke TukḌe chune magar

tujh sā vo be-kal kyā ho

kanch ke TukDe chune magar

tujh sa wo be-kal kya ho