پیار کا پہلا خط لکھنے میں وقت تو لگتا ہے

نئے پرندوں کو اڑنے میں وقت تو لگتا ہے

کچھ اور سبق ہم کو زمانے نے سکھائے

کچھ اور سبق ہم نے کتابوں میں پڑھے تھے

وہ جو قصے میں تھا شامل وہی کہتا ہے مجھے

مجھ کو معلوم نہیں یار یہ قصہ کیا ہے

دل میں جو محبت کی روشنی نہیں ہوتی

اتنی خوب صورت یہ زندگی نہیں ہوتی

کہیں خلوص کہیں دوستی کہیں پہ وفا

بڑے قرینے سے گھر کو سجا کے رکھتے ہیں

بیٹھتے جب ہیں کھلونے وہ بنانے کے لیے

ان سے بن جاتے ہیں ہتھیار یہ قصہ کیا ہے

خود چراغ بن کے جل وقت کے اندھیرے میں

بھیک کے اجالوں سے روشنی نہیں ہوتی

ہمیں پسند نہیں جنگ میں بھی مکاری

جسے نشانے پہ رکھیں بتا کے رکھتے ہیں

کھیل زندگی کے تم کھیلتے رہو یارو

ہار جیت کوئی بھی آخری نہیں ہوتی

دل کی حالت پوچھنے والو

دیکھو کوئی پھول مسل کے

یہ تجربہ ہوا ہے محبت کی راہ میں

کھو کر ملا جو ہم کو وہ پا کر نہیں ملا

مجھ سے جلدی ہار کر میرا حریف

جیتنے کا لطف سارا لے گیا

لطف آرام کا تو کیا جانے

کبھی اے وقت ٹھہر میرے ساتھ

شاعری ہے سرمایا خوش نصیب لوگوں کا

بانس کی ہر اک ٹہنی بانسری نہیں ہوتی

تیری بینائی کسی دن چھین لے گا دیکھنا

دیر تک رہنا ترا یہ آئنوں کے درمیاں