والہانہ مرے دل میں مری جاں میں آ جا

والہانہ مرے دل میں مری جاں میں آ جا

میرے ایماں میں مرے وہم و گماں میں آ جا

موند ان آنکھوں کو صاحب نظراں میں آ جا

حد نظارگیٔ کون و مکاں میں آ جا

آیت رحمت یزداں کی طرح دل میں اتر

ایک اک لفظ میں ایک ایک بیاں میں آ جا

تجھے سینے سے لگا لوں تجھے دل میں رکھ لوں

درد کی چھاؤں میں زخموں کی اماں میں آ جا

کچھ تو ایمائے کرم ہو نگۂ زخم نواز

اب کے ابروئے کشیدہ کی کماں میں آ جا

رونق جاں نہ سہی صورت آسیب سہی

میرے اجڑے ہوئے تاریک مکاں میں آ جا

ہے تمنائے سکوں دل کو تو قیسیؔ کی طرح

حلقۂ درد محبت زدگان میں آ جا