Sher on Basant

aate nazar haiñ dasht-o-jabal zard har taraf

hai ab ke saal aisī hai ai dostāñ basant

aate nazar hain dasht-o-jabal zard har taraf

hai ab ke sal aisi hai ai dostan basant

jab nabī-sāhib meñ koh-o-dasht se aa.ī basant

kar ke mujrā shāh-e-mardāñ kī taraf dhaa.ī basant

jab nabi-sahib mein koh-o-dasht se aai basant

kar ke mujra shah-e-mardan ki taraf dhai basant

basant aa.ī hai mauj-e-rañg-e-gul hai josh-e-sahbā hai

ḳhudā ke fazl se aish-o-tarab kī ab kamī kyā hai

basant aai hai mauj-e-rang-e-gul hai josh-e-sahba hai

KHuda ke fazl se aish-o-tarab ki ab kami kya hai

saaqī kuchh aaj tujh ko ḳhabar hai basant kī

har sū bahār pesh-e-nazar hai basant kī

saqi kuchh aaj tujh ko KHabar hai basant ki

har su bahaar pesh-e-nazar hai basant ki

bulbul huā hai dekh sadā rañg kī bahār

is saal 'ābrū' kuuñ ban aa.ī basant rut

bulbul hua hai dekh sada rang ki bahaar

is sal 'abru' kun ban aai basant rut

aayā basant phuul bhī sho.aloñ meñ Dhal ga.e

maiñ chūmne lagā to mire hoñT jal ga.e

aaya basant phul bhi shoalon mein Dhal gae

main chumne laga to mere honT jal gae

ġhunche niiñ is bahār meñ kaDvāyā apnā dil

bulbul chaman meñ phuul ke gaa.ī basant rut

ghunche nin is bahaar mein kaDwaya apna dil

bulbul chaman mein phul ke gai basant rut

jām-e-aqīq zard hai nargis ke haath meñ

taqsīm kar rahā hai mai-e-arġhavāñ basant

jam-e-aqiq zard hai nargis ke hath mein

taqsim kar raha hai mai-e-arghawan basant

yārab hazār saal salāmat raheñ huzūr

ho roz jashn-e-īd yahāñ jāvedāñ basant

yarab hazar sal salamat rahen huzur

ho roz jashn-e-id yahan jawedan basant

tasvīr-e-rū-e-yār dikhānā basant kā

aTkheliyoñ se dil ko lubhānā basant kā

taswir-e-ru-e-yar dikhana basant ka

aTkheliyon se dil ko lubhana basant ka

ham-rañg kī hai duun nikal ashrafī ke saath

paatā hai aa ke rañg-e-talā.ī yahāñ basant

ham-rang ki hai dun nikal ashrafi ke sath

pata hai aa ke rang-e-talai yahan basant

gar shāḳh-e-za.afarāñ use kahiye to hai ravā

hai farah-baḳhsh vāqa.ī is had kohāñ basant

gar shaKH-e-zafaran use kahiye to hai rawa

hai farah-baKHsh waqai is had kohan basant

qudrat kī barkateñ haiñ ḳhazāna basant kā

kyā ḳhuub kyā ajiib zamāna basant kā

qudrat ki barkaten hain KHazana basant ka

kya KHub kya ajib zamana basant ka

'inshā' se shaiḳh pūchhtā hai kyā salāh hai

tarġhīb-e-bāda dī hai mujhe ai javāñ basant

'insha' se shaiKH puchhta hai kya salah hai

targhib-e-baada di hai mujhe ai jawan basant

har samt sabza-zār bichhānā basant kā

phūloñ meñ rañg-o-bū ko luTānā basant kā

har samt sabza-zar bichhana basant ka

phulon mein rang-o-bu ko luTana basant ka

koyal niiñ aa ke kuuk sunā.ī basant rut

baurā.e ḳhās-o-ām ki aa.ī basant rut

koyal nin aa ke kuk sunai basant rut

baurae KHas-o-am ki aai basant rut

patte nahīñ chaman meñ khaḌakte tire baġhair

kartī hai is libās meñ har-dam fuġhāñ basant

patte nahin chaman mein khaDakte tere baghair

karti hai is libas mein har-dam fughan basant

paiġhām-e-lutf-e-ḳhās sunānā basant kā

dariyā-e-faiz-e-ām bahānā basant kā

paigham-e-lutf-e-KHas sunana basant ka

dariya-e-faiz-e-am bahana basant ka

Tesū ke phuul dashnā-e-ḳhūnī hue use

birhan ke jī kuuñ hai ye kasā.ī basant rut

Tesu ke phul dashna-e-KHuni hue use

birhan ke ji kun hai ye kasai basant rut

kartā hai bāġh-e-dahr meñ nairañgiyāñ basant

aayā hai laakh rañg se ai bāġhbāñ basant

karta hai bagh-e-dahr mein nairangiyan basant

aaya hai lakh rang se ai baghban basant

har shāḳh zard o surḳh o siyah hijr-e-yār meñ

Daste haiñ dil ko aan ke juuñ naag ai basant

har shaKH zard o surKH o siyah hijr-e-yar mein

Daste hain dil ko aan ke jun nag ai basant

joban par in dinoñ hai bahār-e-nashāt-e-bāġh

letā hai phuul bhar ke yahāñ jholiyāñ basant

joban par in dinon hai bahaar-e-nashat-e-bagh

leta hai phul bhar ke yahan jholiyan basant

rashk-e-jināñ chaman ko banānā basant kā

har har kalī meñ rañg dikhānā basant kā

rashk-e-jinan chaman ko banana basant ka

har har kali mein rang dikhana basant ka

dil ko bahut aziiz hai aanā basant kā

'rahbar' kī zindagī meñ samānā basant kā

dil ko bahut aziz hai aana basant ka

'rahbar' ki zindagi mein samana basant ka

ab ke basant aa.ī to āñkheñ ujaḌ ga.iiñ

sarsoñ ke khet meñ koī patta harā na thā

ab ke basant aai to aankhen ujaD gain

sarson ke khet mein koi patta hara na tha

tū ne lagā.ī ab kī ye kyā aag ai basant

jis se ki dil kī aag uThe jaag ai basant

tu ne lagai ab ki ye kya aag ai basant

jis se ki dil ki aag uThe jag ai basant

'mus.hafī' ab ik ġhazal likh tū ġhazal kī tarah se

tā kare aalam kā tārāj-e-shakebā.ī basant

'mushafi' ab ek ghazal likh tu ghazal ki tarah se

ta kare aalam ka taraj-e-shakebai basant