sāmne hai jo use log burā kahte haiñ

jis ko dekhā hī nahīñ us ko ḳhudā kahte haiñ

samne hai jo use log bura kahte hain

jis ko dekha hi nahin us ko KHuda kahte hain

ishq hai ishq ye mazāq nahīñ

chand lamhoñ meñ faisla na karo

ishq hai ishq ye mazaq nahin

chand lamhon mein faisla na karo

tere jaane meñ aur aane meñ

ham ne sadiyoñ kā fāsla dekhā

tere jaane mein aur aane mein

hum ne sadiyon ka fasla dekha

ham to samjhe the ki barsāt meñ barsegī sharāb

aa.ī barsāt to barsāt ne dil toḌ diyā

hum to samjhe the ki barsat mein barsegi sharab

aai barsat to barsat ne dil toD diya

dekhne vaalo tabassum ko karam mat samjho

unheñ to dekhne vāloñ pe hañsī aatī hai

dekhne walo tabassum ko karam mat samjho

unhen to dekhne walon pe hansi aati hai

rone vāloñ se kaho un kā bhī ronā ro leñ

jin ko majbūri-e-hālāt ne rone na diyā

rone walon se kaho un ka bhi rona ro len

jin ko majburi-e-haalat ne rone na diya

merā qātil hī merā munsif hai

kyā mire haq meñ faisla degā

mera qatil hi mera munsif hai

kya mere haq mein faisla dega

zikr jab hogā mohabbat meñ tabāhī kā kahīñ

yaad ham ā.eñge duniyā ko havāloñ kī tarah

zikr jab hoga mohabbat mein tabahi ka kahin

yaad hum aaenge duniya ko hawalon ki tarah

ye sikhāyā hai dostī ne hameñ

dost ban kar kabhī vafā na karo

ye sikhaya hai dosti ne hamein

dost ban kar kabhi wafa na karo

terī āñkhoñ meñ ham ne kyā dekhā

kabhī qātil kabhī ḳhudā dekhā

teri aankhon mein hum ne kya dekha

kabhi qatil kabhi KHuda dekha

mere dukh kī koī davā na karo

mujh ko mujh se abhī judā na karo

mere dukh ki koi dawa na karo

mujh ko mujh se abhi juda na karo

ham se pūchho na dostī kā silā

dushmanoñ kā bhī dil hilā degā

hum se puchho na dosti ka sila

dushmanon ka bhi dil hila dega

ek do roz kā sadma ho to ro leñ 'fākir'

ham ko har roz ke sadmāt ne rone na diyā

ek do roz ka sadma ho to ro len 'fakir'

hum ko har roz ke sadmat ne rone na diya

mere rukte hī mirī sāñseñ bhī ruk jā.eñgī

fāsle aur baḌhā do ki maiñ zinda huuñ abhī

mere rukte hi meri sansen bhi ruk jaengi

fasle aur baDha do ki main zinda hun abhi

ishq meñ ġhairat-e-jazbāt ne rone na diyā

varna kyā baat thī kis baat ne rone na diyā

ishq mein ghairat-e-jazbaat ne rone na diya

warna kya baat thi kis baat ne rone na diya

āshiqī ho ki bandagī 'fāḳhir'

be-dilī se to ibtidā na karo

aashiqi ho ki bandagi 'faKHir'

be-dili se to ibtida na karo

dil to rotā rahe aur aañkh se aañsū na bahe

ishq kī aisī rivāyāt ne dil toḌ diyā

dil to rota rahe aur aankh se aansu na bahe

ishq ki aisi riwayat ne dil toD diya

har taraf ziist kī rāhoñ meñ kaḌī dhuup hai dost

bas tirī yaad ke saa.e haiñ panāhoñ kī tarah

har taraf zist ki rahon mein kaDi dhup hai dost

bas teri yaad ke sae hain panahon ki tarah

apnī sūrat lagī parā.ī sī

jab kabhī ham ne ā.īna dekhā

apni surat lagi parai si

jab kabhi hum ne aaina dekha

dil ke dīvār-o-dar pe kyā dekhā

bas tirā naam hī likhā dekhā

dil ke diwar-o-dar pe kya dekha

bas tera nam hi likha dekha

mirī zabāñ se mirī dāstāñ suno to sahī

yaqīñ karo na karo mehrbāñ suno to sahī

meri zaban se meri dastan suno to sahi

yaqin karo na karo mehrban suno to sahi