شہیدان آزادی

وہ پرستاران آزادی شہیدان وطن

زینت ہندوستاں ہونا تھا جن کا بانکپن

اس وطن کے واسطے کیا کیا سہے رنج و محن

ناز کے قابل ہے ان کی جاں نثاری کا چلن

خون سے سینچا وطن کی سر زمین پاک کو

مرتبہ اکسیر کا بخشا یہاں کی خاک کو

زیست کی ہر ایک نعمت ملک پر قربان تھی

رہنما کے اک اشارے پر تصدق جان تھی

خون دامن پر نہ تھا ان کی یہی پہچان تھی

غازیان ہند کی سب سے نرالی شان تھی

یہ ستم گاروں کو الفت کا سبق دے کر گئے

جن کو مرنا چاہئے تھا ان کے بدلے مر گئے

جب ہوئی محسوس آزادی کی ان کو احتیاج

اور ان فرماں رواؤں سے کیا جب احتجاج

طیش سے تھرا گیا برطانیہ کا سامراج

ظلم سے اس کے ہوا بیدار پھر سارا سماج

ملک میں کھولا انہوں نے جنگ آزادی کا باب

سامراجی ظلم جس سے ہو گیا پھر بے نقاب

گولیاں کتنی چلائیں جلیاں والے باغ پر

ظلم پھر ڈھائے اودھ کی بیگموں کو مار کر

تین دن کس طرح فاقے سے رہے شاہ ظفر

تیسرے دن طشت پر لائے گئے بیٹوں کے سر

ظلم کی تاریخ خونیں سے ہیں گو ناشاد ہم

آج کے دن فخر سے کرتے ہیں ان کو یاد ہم

اور اس کے بعد بھی قربانیاں دیتے رہے

پھر بھگت سنگھ اور ساتھی اس کے سولی پر چڑھے

سر پہ لالہ لاجپت رائے کے بھی ڈنڈے پڑے

بوس بابو ملک سے باہر ہی جا کر مر گئے

اور لاکھوں مر گئے جن کے نہیں معلوم نام

آج ہم کرتے ہیں ان سارے شہیدوں کو سلام

رنگ لایا ہے بالآخر ان شہیدوں کا لہو

ہو گئی آزاد ہو جانے کی پوری آرزو

اور ہیں تکمیل آزادی کے چرچے چار سو

ایک دن بن جائے گا یہ ملک جنت ہو بہو

خواب دیکھا تھا انہوں نے اس کی یہ تعبیر ہے

ملک میں جاری ہر اک عنوان سے تعمیر ہے

ان کی عظمت سے سبق لیں آج اہل اقتدار

کرسیوں پر بیٹھ جانے سے نہیں ملتا وقار

حکمرانی چھوڑ کر بن جائیں وہ خدمت گزار

نام ان کا جاں نثاران وطن میں ہو شمار

جس میں ہو مطلب پرستی زیست وہ ناکام ہے

زندگی آخر شفاؔ قربانیوں کا نام ہے