دلیپ کمار

ارے ہیرو!

اداکاری نہ کر چل اٹھ

کہ لاکھوں دل تری آنکھوں سے دھڑکن لینے آئے ہیں

چلو مانا تری آنکھیں کچھ ایسی تھیں

کہ اس بے کار سیارے پہ ان کا دیر تک رہنا

نہ بنتا تھا

مگر پیارے!

تری آنکھوں کی رخصت روشنی کی ہار ہی تو ہے

تو کیوں خاموش ہے کچھ کہہ

کہ تیری بے کراں آواز میں تو لاکھوں صدیوں کی صدائیں تھیں

ترے چہرے کا ہر گہرا تأثر ایسا چرخہ تھا

کہ جس پر اپنے جذبے کاڑھتے تھے ہم

سو اس چرخے کی کوک اب کس لیے چپ ہے

کہانی کا ہدایت کار بھی شاید تری آنکھوں کی گہرائی سے خائف تھا

وہ مل جائے تو بولیں گے

کہ اس کردار کا جانا نہ بنتا تھا!

چل آنکھیں کھول تجھ سے ملنے لاکھوں لوگ آئے ہیں

کسی کو بھی یقیں آتا نہیں ہے تیرے جانے کا

انہیں لگتا ہے ان کے روتے روتے تو اٹھے گا اور کہے گا:

غم نہیں کرنا

گلوں کی زندگانی موت سے کب ختم ہوتی ہے

محبت کی کہانی موت سے کب ختم ہوتی ہے