مری جانب وہ خالص شوربا سرکائے جاتے ہیں

مری جانب وہ خالص شوربا سرکائے جاتے ہیں

مگر خود مرغ پر اپنا کرم فرمائے جاتے ہیں

کہا تھا ڈاکٹر نے بچ کے رہنا خوش خوراکی سے

مگر توبہ وہ بیٹھے ہیں تو اب تک کھائے جاتے ہیں

چلے آؤ ملاقاتوں کی گرمی ساتھ میں لے کر

کہاں ہو تم یہاں ہم جون میں ٹھنڈائے جاتے ہیں

انہیں سے ہو گیا رشتہ ہمارا ٹھیک ہے لیکن

نہ جانے پھر بھی کیوں چکر پہ چکر آئے جاتے ہیں

سڑک پر آتے جاتے سب انہیں پہچان لیتے تھے

نہ اب معشوق ہی ویسے نہ عاشق پائے جاتے ہیں

بھروسہ ہے وفاداری پہ ان کی کہہ دیا پھر بھی

قسم وہ ہاتھ میرے سر پہ رکھ کر کھائے جاتے ہیں

جوانی ان کو گھر میں چین سے رہنے نہیں دیتی

میاں مسرورؔ ہی مجرم مگر ٹھہرائے جاتے ہیں