عاشقی میں ہم کو اب تک مار کھانا یاد ہے

عاشقی میں ہم کو اب تک مار کھانا یاد ہے

جسم پر چونا کبھی ہلدی لگانا یاد ہے

عشق میں ان کے پٹے تھے ہم جہاں پہلے پہل

مدتیں گزریں پر اب تک وہ ٹھکانا یاد ہے

تین دن تک خوف کے مارے چھپے تھے جس جگہ

اس جگہ بننے کو تھا اک غسل خانہ یاد ہے

پہلے آ کے ان کے ڈیڈی نے بھنبھوڑا تھا ہمیں

اور پھر کتے کا ہم کو کاٹ کھانا یاد ہے

ان کی امی ہو چلیں تھیں رفتہ رفتہ ہم خیال

ہاں مگر ابا کا ان کے ورغلانا یاد ہے

تاک کر گلا چلایا تھا جو ان کی آنکھ پر

ان کے ابا کو مرا اب تک نشانہ یاد ہے

شربت دیدار کی تھیں چسکیاں سب کے لئے

بند تھا مسرور پر ہی آب و دانہ یاد ہے