sanware hai gesu to dekha kare hai

sañvāre hai gesū to dekhā kare hai

vo ab dil ko ā.īna jaanā kare hai

na bāteñ kare hai na dekhā kare hai

magar mere baare meñ sochā kare hai

mohabbat se vo dushmanī hai ki duniyā

havā bhī lage hai to charchā kare hai

tumhārī tarah bevafā kaun hogā

hameñ vaqt ab tak pukārā kare hai

guzarte to ham bhī haiñ us kī galī se

sunā hai vo chhup chhup ke dekhā kare hai

ik aatī hai manzil ki har husn vaalā

tamannā.iyoñ kī tamannā kare hai

vahāñ lā ke chhoḌā hai us ne ki insāñ

jahāñ zahr khānā gavārā kare hai

gile karte phiriye ki dīvāna baniye

paḌī hai vo aisoñ kī parvā kare hai

jo ġhuncha sar-e-shām chaTke to samjho

kisī par vafā kā taqāzā kare hai

kisī ne unheñ ye sujhā dī ki 'mahshar'

tumheñ sher kah kah ke rusvā kare hai

sanware hai gesu to dekha kare hai

wo ab dil ko aaina jaana kare hai

na baaten kare hai na dekha kare hai

magar mere bare mein socha kare hai

mohabbat se wo dushmani hai ki duniya

hawa bhi lage hai to charcha kare hai

tumhaari tarah bewafa kaun hoga

hamein waqt ab tak pukara kare hai

guzarte to hum bhi hain us ki gali se

suna hai wo chhup chhup ke dekha kare hai

ek aati hai manzil ki har husn wala

tamannaiyon ki tamanna kare hai

wahan la ke chhoDa hai us ne ki insan

jahan zahr khana gawara kare hai

gile karte phiriye ki diwana baniye

paDi hai wo aison ki parwa kare hai

jo ghuncha sar-e-sham chaTke to samjho

kisi par wafa ka taqaza kare hai

kisi ne unhen ye sujha di ki 'mahshar'

tumhein sher kah kah ke ruswa kare hai