poshida kyun hai tur pe jalwa dikha ke dekh

poshīda kyuuñ hai tuur pe jalva dikhā ke dekh

ai dost merī tāb-e-nazar aazmā ke dekh

phūloñ kī tāzgī hī nahīñ dekhne kī chiiz

kāñToñ kī samt bhī to nigāheñ uThā ke dekh

letā nahīñ kisī kā pas-e-marg koī naam

duniyā ko dekhnā hai to duniyā se jā ke dekh

dil meñ hamāre dard zamāne kā hai nihāñ

paivast dil meñ saikḌoñ paikāñ jafā ke dekh

jo bāda-ḳhvār-e-ġham haiñ unheñ bhī kabhī kabhī

saaqī sharāb-e-husn ke sāġhar pilā ke dekh

ban jā.egā kabhī na kabhī dard hī davā

'as.ad' ke dil meñ dard kī shiddat baḌhā ke dekh

poshida kyun hai tur pe jalwa dikha ke dekh

ai dost meri tab-e-nazar aazma ke dekh

phulon ki tazgi hi nahin dekhne ki chiz

kanTon ki samt bhi to nigahen uTha ke dekh

leta nahin kisi ka pas-e-marg koi nam

duniya ko dekhna hai to duniya se ja ke dekh

dil mein hamare dard zamane ka hai nihan

paiwast dil mein saikDon paikan jafa ke dekh

jo baada-KHwar-e-gham hain unhen bhi kabhi kabhi

saqi sharab-e-husn ke saghar pila ke dekh

ban jaega kabhi na kabhi dard hi dawa

'asad' ke dil mein dard ki shiddat baDha ke dekh