موجب رنگ چمن خون شہیداں نکلا

موجب رنگ چمن خون شہیداں نکلا

موت کی جیب سے بھی زیست کا ساماں نکلا

ٹھوکریں کھائی ہیں اتنی کہ اب اپنے دل سے

شوق آوارگیٔ دشت و بیاباں نکلا

ہم بہت خوش تھے کہ جاگ اٹھی ہے اپنی قسمت

آنے والا کسی ہمسائے کا مہماں نکلا

ہے عجب بات کہ جس رستے پہ ہم چل نکلے

گھوم پھر کر وہ سر کوچۂ جاناں نکلا

بے حسی نے جو کبھی فرصت غم دی ہم کو

ایک سیلاب نہفتہ تہ مژگاں نکلا

چارہ گر خطرۂ جاں کہتے تھے جس کو باصرؔ

وہی غم باعث آرام رگ جاں نکلا