fursat mein raha karte hain fursat se zyaada

fursat meñ rahā karte haiñ fursat se zyāda

masrūf haiñ ham log zarūrat se zyāda

miltā hai sukūñ mujh ko qanā.at se zyāda

masrūr huuñ maiñ apnī masarrat se zyāda

chaltā hī nahīñ dānish o hikmat se koī kaam

bantī hai yahāñ baat himāqat se zyāda

tanhā maiñ hirāsāñ nahīñ is kār-e-junūñ meñ

sahrā hai pareshāñ mirī vahshat se zyāda

ab koī bhī sachchā.ī mire saath nahīñ hai

yaanī maiñ gunahgār huuñ tohmat se zyāda

is reg-e-ravāñ ko maiñ sameTūñ bhī kahāñ tak

bikhrā hai vo har-sū mirī vus.at se zyāda

raushan hai bahut jhuuT mire ahd meñ 'aḳhtar'

afsāna munavvar hai haqīqat se zyāda

fursat mein raha karte hain fursat se zyaada

masruf hain hum log zarurat se zyaada

milta hai sukun mujh ko qanaat se zyaada

masrur hun main apni masarrat se zyaada

chalta hi nahin danish o hikmat se koi kaam

banti hai yahan baat himaqat se zyaada

tanha main hirasan nahin is kar-e-junun mein

sahra hai pareshan meri wahshat se zyaada

ab koi bhi sachchai mere sath nahin hai

yani main gunahgar hun tohmat se zyaada

is reg-e-rawan ko main sameTun bhi kahan tak

bikhra hai wo har-su meri wusat se zyaada

raushan hai bahut jhuT mere ahd mein 'aKHtar'

afsana munawwar hai haqiqat se zyaada