unki surat hamein aai thi pasand aankhon se

un kī sūrat hameñ aa.ī thī pasand āñkhoñ se

aur phir ho ga.ī bālā-o-buland āñkhoñ se

koī zanjīr nahīñ tār-e-nazar se mazbūt

ham ne is chāñd pe Daalī hai kamand āñkhoñ se

Thahr saktī hai kahāñ us ruḳh-e-tābāñ pe nazar

dekh saktā hai use aadmī band āñkhoñ se

ham uThāte haiñ maza talḳhī o shīrīnī kā

mai piyāle se pilātā hai vo qand āñkhoñ se

baat karte ho to hotā hai zabāñ se sadma

dekhte ho to pahuñchtā hai gazand āñkhoñ se

har mulāqāt meñ hotī haiñ hamāre mābain

chand bāteñ lab-e-guftār se chand āñkhoñ se

ishq meñ hausla-mandī bhī zarūrī hai 'shu.ūr'

dekhiye us kī taraf hausla-mand āñkhoñ se

un ki surat hamein aai thi pasand aankhon se

aur phir ho gai baala-o-buland aankhon se

koi zanjir nahin tar-e-nazar se mazbut

hum ne is chand pe Dali hai kamand aankhon se

Thahr sakti hai kahan us ruKH-e-taban pe nazar

dekh sakta hai use aadmi band aankhon se

hum uThate hain maza talKHi o shirini ka

mai piyale se pilata hai wo qand aankhon se

baat karte ho to hota hai zaban se sadma

dekhte ho to pahunchta hai gazand aankhon se

har mulaqat mein hoti hain hamare mabain

chand baaten lab-e-guftar se chand aankhon se

ishq mein hausla-mandi bhi zaruri hai 'shuur'

dekhiye us ki taraf hausla-mand aankhon se