meri dastaras mein hai gar qalam mujhe husn-e-fikr-o-KHayal de

mirī dastaras meñ hai gar qalam mujhe husn-e-fikr-o-ḳhayāl de

mujhe shahryār-e-suḳhan banā aur enān-e-shahr-e-kamāl de

mirī shāḳh-e-sher rahe harī de mire suḳhan ko sanobarī

mirī jhiil meñ bhī kañval khilā mirī gudḌiyoñ ko bhī la.al de

tirī baḳhshishoñ meñ hai sarvarī mire ishq ko de qalandarī

jo uThe to dast-e-duā lage mujhe aisā dast-e-savāl de

rag-e-jāñ meñ jamne lagā lahū use mushk banñe kī aarzū

hai udaas dasht-e-tatār-e-dil use phir shalañg-e-ġhazāl de

koī baat aqrab-o-shams kī koī zikr-e-zohra-o-mushtarī

tū baḌā sitāra-shanās hai mujhe koī achchhī sī faal de

haiñ ye jism-o-jāñ kī quyūd kyā ḳhad-o-ḳhāl ke ye hudūd kyā

maiñ huuñ aks-e-manzar-e-māvarā mujhe ā.inoñ se nikāl de

maiñ vahī huuñ 'tishna'-e-bā-vafā mirā aaj bhī vahī mudda.ā

na firāq de mujhe mustaqil na mujhe hamesha visāl de

meri dastaras mein hai gar qalam mujhe husn-e-fikr-o-KHayal de

mujhe shahryar-e-suKHan bana aur enan-e-shahr-e-kamal de

meri shaKH-e-sher rahe hari de mere suKHan ko sanobari

meri jhil mein bhi kanwal khila meri gudDiyon ko bhi lal de

teri baKHshishon mein hai sarwari mere ishq ko de qalandari

jo uThe to dast-e-dua lage mujhe aisa dast-e-sawal de

rag-e-jaan mein jamne laga lahu use mushk banne ki aarzu

hai udas dasht-e-tatar-e-dil use phir shalang-e-ghazal de

koi baat aqrab-o-shams ki koi zikr-e-zohra-o-mushtari

tu baDa sitara-shanas hai mujhe koi achchhi si fal de

hain ye jism-o-jaan ki quyud kya KHad-o-KHal ke ye hudud kya

main hun aks-e-manzar-e-mawara mujhe aainon se nikal de

main wahi hun 'tishna'-e-ba-wafa mera aaj bhi wahi muddaa

na firaq de mujhe mustaqil na mujhe hamesha visal de