yunhi fareb-e-nazar ki tanab TuTti hai

yūñhī fareb-e-nazar kī tanāb TūTtī hai

qadam baḌhā.iye mauj-e-sarāb TūTtī hai

jahāñ chaTaktā hai ġhuncha zamīn-e-ālam par

vahīñ pe tishnagī-e-āftāb TūTtī hai

naqāb uThāo to har shai ko pāoge sālim

ye kā.enāt ba-taur-e-hijāb TūTtī hai

darūn-e-āb sañvarte haiñ sad-harīm guhar

kanār-e-bahr jo mehrāb-e-āb TūTtī hai

mukāshafāt ke TukḌe haiñ zehn ke aurāq

kitāb utartī nahīñ hai kitāb TūTtī hai

bas ek aan meñ khultā hai qufl dariyā kā

bas ek aan meñ qaid-e-hubāb TūTtī hai

haiñ is shikast meñ ḳhalq-e-jadīd ke asrār

haqīqat aaj bhī ham-rāh-e-ḳhvāb TūTtī hai

kamāl shai hai kamar bhī hasīna-e-ġham kī

jilau meñ le ke ka.ī inqalāb TūTtī hai

yunhi fareb-e-nazar ki tanab TuTti hai

qadam baDhaiye mauj-e-sarab TuTti hai

jahan chaTakta hai ghuncha zamin-e-alam par

wahin pe tishnagi-e-aftab TuTti hai

naqab uThao to har shai ko paoge salim

ye kaenat ba-taur-e-hijab TuTti hai

darun-e-ab sanwarte hain sad-harim guhar

kanar-e-bahr jo mehrab-e-ab TuTti hai

mukashafat ke TukDe hain zehn ke auraq

kitab utarti nahin hai kitab TuTti hai

bas ek aan mein khulta hai qufl dariya ka

bas ek aan mein qaid-e-hubab TuTti hai

hain is shikast mein KHalq-e-jadid ke asrar

haqiqat aaj bhi ham-rah-e-KHwab TuTti hai

kamal shai hai kamar bhi hasina-e-gham ki

jilau mein le ke kai inqalab TuTti hai