tamam dard kisi lai mein gungunate hue

tamām dard kisī lai meñ gungunāte hue

vo kho gayā kahīñ shiv-ranjinī sunāte hue

qusūr vaqt kā lailā kā thā na duniyā kā

vo qais thā jo rahā bār-e-jāñ uThāte hue

hamīñ ne chaar girah rañg rakh diyā dar par

hamīñ ne yaad kiyā ḳhushbuoñ ko jaate hue

dhueñ meñ ho ga.ī tabdīl rang-o-bū kho kar

bayār sabz banoñ se nagar ko aate hue

ai zindagī kabhī inkār kā sabab bhī sun

maiñ thak gayā huuñ terī haañ meñ haañ milāte hue

tamam dard kisi lai mein gungunate hue

wo kho gaya kahin shiw-ranjini sunate hue

qusur waqt ka laila ka tha na duniya ka

wo qais tha jo raha bar-e-jaan uThate hue

hamin ne chaar girah rang rakh diya dar par

hamin ne yaad kiya KHushbuon ko jate hue

dhuen mein ho gai tabdil rang-o-bu kho kar

bayar sabz banon se nagar ko aate hue

ai zindagi kabhi inkar ka sabab bhi sun

main thak gaya hun teri han mein han milate hue