siyah dasht ki jaanib safar dobara kiya

siyāh dasht kī jānib safar dobāra kiyā

na jaane qaaf kī pariyoñ ne kyā ishāra kiyā

na tez o tund havā se milī najāt mujhe

na maiñ ne saltanat-e-ḳhāk se kināra kiyā

falak kī samt nigāheñ uThāne se pahle

zamīñ ke saare manāzir ko paara paara kiyā

siyāh ban meñ chamaktā huuñ misl-e-dīda-e-sher

ye kis ne zarra-e-āvāra ko sitāra kiyā

ḳhumār-e-ḳhvāb utarne meñ thoḌī der lagī

phir us ke baad baḌe shauq se nazāra kiyā

kisī ne muuñd ke āñkhoñ ko phir se khol diyā

ye kis ne aap ko duniyā pe āshkārā kiyā

hamāre hone ke manzar kī bhī karāmat dekh

tumhārī chashm ko favvāra-e-sharāra kiyā

nashe meñ naqsha riyāsat hī kā bigāḌ diyā

ye kyā kiyā ki samarqand ko buḳhārā kiyā

siyah dasht ki jaanib safar dobara kiya

na jaane qaf ki pariyon ne kya ishaara kiya

na tez o tund hawa se mili najat mujhe

na main ne saltanat-e-KHak se kinara kiya

falak ki samt nigahen uThane se pahle

zamin ke sare manazir ko para para kiya

siyah ban mein chamakta hun misl-e-dida-e-sher

ye kis ne zarra-e-awara ko sitara kiya

KHumar-e-KHwab utarne mein thoDi der lagi

phir us ke baad baDe shauq se nazara kiya

kisi ne mund ke aankhon ko phir se khol diya

ye kis ne aap ko duniya pe aashkara kiya

hamare hone ke manzar ki bhi karamat dekh

tumhaari chashm ko fawwara-e-sharara kiya

nashe mein naqsha riyasat hi ka bigaD diya

ye kya kiya ki samarqand ko buKHara kiya