pathrili si sham mein tumne aise yaad kiya jaanam

pathrīlī sī shaam meñ tum ne aise yaad kiyā jānam

saarī raat tumhārī ḳhātir maiñ ne zahr piyā jānam

sūraj kī mānind banā huuñ reza reza bikhrā huuñ

ab jīvan kā sar-chashma huuñ vaise ḳhuub jilā jānam

tum ne mujh meñ jo kuchh khoyā us kī qīmat tum jaano

maiñ ne tum se jo kuchh paayā hai vo besh-bahā jānam

tum ko bhī pahchān nahīñ hai shāyad merī uljhan kī

lekin ham milte rahte to achchhā hī rahtā jānam

ye sāhab jin se mil kar sab kā jī ḳhush ho jaatā hai

raat ga.e tak un ke kamre meñ jaltā hai kyā jānam

rakh paao to rok lo ham ko gahrā.ī ke baasī haiñ

bahte paanī ke qatroñ meñ hotā hai dariyā jānam

dard-e-judā.ī meñ likkhe haiñ sher tumhāre naam bahut

tum mere ghar meñ rahtīñ to kyā aisā hotā jānam

pathrili si sham mein tum ne aise yaad kiya jaanam

sari raat tumhaari KHatir main ne zahr piya jaanam

suraj ki manind bana hun reza reza bikhra hun

ab jiwan ka sar-chashma hun waise KHub jila jaanam

tum ne mujh mein jo kuchh khoya us ki qimat tum jaano

main ne tum se jo kuchh paya hai wo besh-baha jaanam

tum ko bhi pahchan nahin hai shayad meri uljhan ki

lekin hum milte rahte to achchha hi rahta jaanam

ye sahab jin se mil kar sab ka ji KHush ho jata hai

raat gae tak un ke kamre mein jalta hai kya jaanam

rakh pao to rok lo hum ko gahrai ke basi hain

bahte pani ke qatron mein hota hai dariya jaanam

dard-e-judai mein likkhe hain sher tumhaare nam bahut

tum mere ghar mein rahtin to kya aisa hota jaanam