مجھ سا بیتاب یہاں کوئی نہیں میرے سوا

مجھ سا بیتاب یہاں کوئی نہیں میرے سوا

یعنی برباد جہاں کوئی نہیں میرے سوا

روشنی تھی تو کئی سائے نظر آتے تھے

تیرگی ہے تو یہاں کوئی نہیں میرے سوا

بھیڑ میں ایک طرف گوشۂ اخلاص بھی ہے

غور سے دیکھ وہاں کوئی نہیں میرے سوا

شہر میرے ہی بھروسے پہ ہو خفتہ جیسے

ہدف شور سگاں کوئی نہیں میرے سوا

سر بلندی مری تنہائی تک آ پہنچی ہے

میں وہاں ہوں کہ جہاں کوئی نہیں میرے سوا

شعر میں غیر کی تشبیہ کہاں سے آئے

میری مانند یہاں کوئی نہیں میرے سوا

چین لکھتا ہے مرے خواب کا راوی راشدؔ

اس سمندر میں رواں کوئی نہیں میرے سوا