mila jo koi yahan ramz-ashna na mujhe

milā jo koī yahāñ ramz-āshnā na mujhe

vabāl-e-hosh rahā harf-e-mahramāna mujhe

udaas phirtī hai shādāb vādiyoñ kī mahak

hai kā.enāt yahī kunj-e-āshiyāna mujhe

adū kī sañg-zanī kī nahīñ mujhe parvā

tire karam kā mayassar hai shāmiyāna mujhe

koī ilāj-e-ġham-e-zindagī batā vaa.iz

sune hue jo fasāne haiñ phir sunā na mujhe

subuk-sarī meñ zamīn-e-vatan bhī tañg huī

kashāñ kashāñ liye phirtā hai āb-o-dāna mujhe

mire nasīb meñ hai kisht-e-jāñ kī vīrānī

na aa.ī raas rah-o-rasm-e-āshiqāna mujhe

bhaTak rahā huuñ usī kī talāsh meñ 'aḳhtar'

ki jis dayār ko chhoḌe huā zamāna mujhe

mila jo koi yahan ramz-ashna na mujhe

wabaal-e-hosh raha harf-e-mahramana mujhe

udas phirti hai shadab wadiyon ki mahak

hai kaenat yahi kunj-e-ashiyana mujhe

adu ki sang-zani ki nahin mujhe parwa

tere karam ka mayassar hai shamiyana mujhe

koi ilaj-e-gham-e-zindagi bata waiz

sune hue jo fasane hain phir suna na mujhe

subuk-sari mein zamin-e-watan bhi tang hui

kashan kashan liye phirta hai aab-o-dana mujhe

mere nasib mein hai kisht-e-jaan ki virani

na aai ras rah-o-rasm-e-ashiqana mujhe

bhaTak raha hun usi ki talash mein 'aKHtar'

ki jis dayar ko chhoDe hua zamana mujhe