mana ki zindagi se hamein kuchh mila bhi hai

maanā ki zindagī se hameñ kuchh milā bhī hai

is zindagī ko ham ne bahut kuchh diyā bhī hai

mahsūs ho rahā hai ki tanhā nahīñ huuñ maiñ

shāyad kahīñ qarīb koī dūsrā bhī hai

qātil ne kis safā.ī se dhoī hai āstīñ

us ko ḳhabar nahīñ ki lahū boltā bhī hai

ġharqāb kar diyā thā hameñ nā-ḳhudāoñ ne

vo to kaho ki ek hamārā ḳhudā bhī hai

ho to rahī hai koshish-e-ārā.ish-e-chaman

lekin chaman ġharīb meñ ab kuchh rahā bhī hai

ai qāfile ke logo zarā jāgte raho

sunte haiñ qāfile meñ koī rahnumā bhī hai

ham phir bhī apne chehre na dekheñ to kyā ilaaj

āñkheñ bhī haiñ charāġh bhī hai aa.inā bhī hai

'iqbāl' shukr bhejo ki tum dīda-var nahīñ

dīda-varoñ ko aaj koī pūchhtā bhī hai

mana ki zindagi se hamein kuchh mila bhi hai

is zindagi ko hum ne bahut kuchh diya bhi hai

mahsus ho raha hai ki tanha nahin hun main

shayad kahin qarib koi dusra bhi hai

qatil ne kis safai se dhoi hai aastin

us ko KHabar nahin ki lahu bolta bhi hai

gharqab kar diya tha hamein na-KHudaon ne

wo to kaho ki ek hamara KHuda bhi hai

ho to rahi hai koshish-e-araish-e-chaman

lekin chaman gharib mein ab kuchh raha bhi hai

ai qafile ke logo zara jagte raho

sunte hain qafile mein koi rahnuma bhi hai

hum phir bhi apne chehre na dekhen to kya ilaj

aankhen bhi hain charagh bhi hai aaina bhi hai

'iqbaal' shukr bhejo ki tum dida-war nahin

dida-waron ko aaj koi puchhta bhi hai