کہہ بھی دوں حال دل اگر شاید

کہہ بھی دوں حال دل اگر شاید

ان پہ ہو جائے کچھ اثر شاید

اب زمانہ ہے بے وفائی کا

سیکھ لیں ہم بھی یہ ہنر شاید

بعد مدت کے یہ خیال آیا

راس آیا نہیں سفر شاید

ہم ہی اب تک سمجھ نہیں پائے

کچھ تو کہتی ہے وہ نظر شاید

ویسے تو فاصلہ نہیں کوئی

کشمکش ہے اگر مگر شاید

ہر نظارے میں اس کا ہی جلوہ

تم کو آتا نہیں نظر شاید

اجنبی اجنبی سے چہرے ہیں

یہ نہیں ہے مرا نگر شاید

نیند طاری ہے آسمانوں پر

یا دعا میں نہیں اثر شاید

اب کوئی آرزو نہیں باقی

ختم ہوتا ہے یہ سفر شاید

موج در موج ایک نشہ تھا

اب وہ دریا گیا اتر شاید

زندگی اب تجھے سنوارے کیا

کوششیں ساری بے اثر شاید

اک جہاں اجنبی رہا میتاؔ

اک جہاں مجھ سے باخبر شاید