کبھی جو شب کی سیاہی سے ناگہاں گزرے

کبھی جو شب کی سیاہی سے ناگہاں گزرے

ہم اہل ظرف ہر اک سوچ پر گراں گزرے

نگاہ و دل سے مٹا دیں جو تشنگی کا عذاب

وہ آبشار کے دھارے ابھی کہاں گزرے

غم آفریں تھا مسلسل سکوت شہر حبیب

ہم اس گلی سے مگر پھر بھی شادماں گزرے

شکستگی کی طلسمی فضا نئی تو نہیں

یہاں تو ایسے کئی دور امتحاں گزرے

نظر میں شوخ شبیہیں لیے ہوئے ہے سحر

ابھی نہ کوئی ادھر سے دھواں دھواں گزرے

تمام کوہ کشاکش تھا میرے سر پہ خیالؔ

اگرچہ اور بھی دنیا میں سخت جاں گزرے