dilon se dard dua se asar nikalta hai

diloñ se dard duā se asar nikaltā hai

ye kis bahisht kī jānib bashar nikaltā hai

paḌā hai shahr meñ chāñdī ke bartanoñ kā rivāj

so is azaab se ab kūza-gar nikaltā hai

miyāñ ye chādar-e-shohrat tum apne paas rakho

ki is se paañv jo Dhāñpeñ to sar nikaltā hai

ḳhayāl-e-gardish-e-daurāñ ho kyā use ki jo shaḳhs

girah meñ maañ kī duā bāñdh kar nikaltā hai

maiñ sañg-e-mīl huuñ patthar nahīñ huuñ raste kā

so kyuuñ zamāna mujhe rauñd kar nikaltā hai

mire suḳhan pe tū dād-e-suḳhan nahīñ detā

tirī taraf mirā qarz-e-hunar nikaltā hai

suḳhnvarān-e-qad-āvar meñ terā qad 'muḳhtār'

ajab nahīñ hai jo bālisht-bhar nikaltā hai

dilon se dard dua se asar nikalta hai

ye kis bahisht ki jaanib bashar nikalta hai

paDa hai shahr mein chandi ke bartanon ka riwaj

so is azab se ab kuza-gar nikalta hai

miyan ye chadar-e-shohrat tum apne pas rakho

ki is se panw jo Dhanpen to sar nikalta hai

KHayal-e-gardish-e-dauran ho kya use ki jo shaKHs

girah mein man ki dua bandh kar nikalta hai

main sang-e-mil hun patthar nahin hun raste ka

so kyun zamana mujhe raund kar nikalta hai

mere suKHan pe tu dad-e-suKHan nahin deta

teri taraf mera qarz-e-hunar nikalta hai

suKHnwaran-e-qad-awar mein tera qad 'muKHtar'

ajab nahin hai jo baalisht-bhar nikalta hai