bazm-e-suKHan ko aap ki dil-gir chal paDe

bazm-e-suḳhan ko aap kī dil-gīr chal paḌe

'ġhālib' ka.ī chale haiñ ka.ī 'mīr' chal paḌe

jannat kī kyā bisāt ki vo chal ke aa.egī

merī taraf to vādī-e-kashmīr chal paḌe

harakat meñ aa ga.e haiñ sabhī rañg-e-ḳhāl-o-ḳhat

un kī nazar ke sehr se tasvīr chal paḌe

dekhā jo mujh ko aap kī palkeñ jhapak ga.iiñ

ik jism-e-nā-tavāñ pe ka.ī tiir chal paḌe

qaidī rihā hue the pahan kar na.e libās

ham to qafas se oḌh ke zanjīr chal paḌe

toḌā nahīñ hai shāḳh se ḳhush thī bakāolī

ham le ke us ke phuul kī tasvīr chal paḌe

pūchā kisī ne aap ko jaanā hai kis taraf

ham log sū-e-vādī-e-kashmīr chal paḌe

'sāqib' ham apne gaañv kī barbādiyoñ ke ba.ad

is dil meñ le ke hasrat-e-tāmīr chal paḌe

bazm-e-suKHan ko aap ki dil-gir chal paDe

'ghaalib' kai chale hain kai 'mir' chal paDe

jannat ki kya bisat ki wo chal ke aaegi

meri taraf to wadi-e-kashmir chal paDe

harakat mein aa gae hain sabhi rang-e-KHal-o-KHat

un ki nazar ke sehr se taswir chal paDe

dekha jo mujh ko aap ki palken jhapak gain

ek jism-e-na-tawan pe kai tir chal paDe

qaidi riha hue the pahan kar nae libas

hum to qafas se oDh ke zanjir chal paDe

toDa nahin hai shaKH se KHush thi bakaoli

hum le ke us ke phul ki taswir chal paDe

pucha kisi ne aap ko jaana hai kis taraf

hum log su-e-wadi-e-kashmir chal paDe

'saqib' hum apne ganw ki barbaadiyon ke baad

is dil mein le ke hasrat-e-tamir chal paDe