ab ye hangama-e-duniya nahin dekha jata

ab ye hañgāma-e-duniyā nahīñ dekhā jaatā

roz apnā hī tamāshā nahīñ dekhā jaatā

sair-e-hastī meñ kahīñ aur bhī ghuum aate haiñ

ek hī shahr-e-tamannā nahīñ dekhā jaatā

ḳhunki-e-lams-e-rifāqat hī bahut hotī hai

dhuup hamdam ho to saaya nahīñ dekhā jaatā

khol dete haiñ palaT aane pe darvāza-e-dil

aane vaale kā irāda nahīñ dekhā jaatā

āsmānoñ meñ bhī ik aisī kamāñ hai jis se

koī ḳhush-rañg parinda nahīñ dekhā jaatā

apne hoñToñ pe bichhā detā huuñ ik mauj-e-sarāb

pyaas aisī hai ki dariyā nahīñ dekhā jaatā

fart-e-vahshat meñ kahīñ aur nikal aayā huuñ

ghar kā rasta hai ki sahrā nahīñ dekhā jaatā

merī jānib bhī to ruḳh kar kabhī ai shāh-e-jamāl

ā.īna mujh se ziyāda nahīñ dekhā jaatā

ab ye hangama-e-duniya nahin dekha jata

roz apna hi tamasha nahin dekha jata

sair-e-hasti mein kahin aur bhi ghum aate hain

ek hi shahr-e-tamanna nahin dekha jata

KHunki-e-lams-e-rifaqat hi bahut hoti hai

dhup hamdam ho to saya nahin dekha jata

khol dete hain palaT aane pe darwaza-e-dil

aane wale ka irada nahin dekha jata

aasmanon mein bhi ek aisi kaman hai jis se

koi KHush-rang parinda nahin dekha jata

apne honTon pe bichha deta hun ek mauj-e-sarab

pyas aisi hai ki dariya nahin dekha jata

fart-e-wahshat mein kahin aur nikal aaya hun

ghar ka rasta hai ki sahra nahin dekha jata

meri jaanib bhi to ruKH kar kabhi ai shah-e-jamal

aaina mujh se ziyaada nahin dekha jata