urdu zaban

ye kaisā ishq hai urdu zabāñ kaa,

mazā ghultā hai lafzoñ kā zabāñ par

ki jaise paan meñ mahñgā qimām ghultā hai

ye kaisā ishq hai urdu zabāñ kaa....

nasha aatā hai urdu bolne meñ

gilaurī kī tarah haiñ muñh lagī sab istelāheñ

lutf detī hai, halaq chhūtī hai urdu to, halaq se jaise mai kā ghoñT utartā hai

baḌī aristocracy hai zabāñ meñ

faqīrī meñ navābī kā mazā detī hai urdu

agarche ma.anī kam hote hai urdu meñ

alfāz kī ifrāt hotī hai

magar phir bhii, buland āvāz paḌhiye to bahut hī mo'tabar lagtī haiñ bāteñ

kahīñ kuchh duur se kānoñ meñ paḌtī hai agar urdu

to lagtā hai ki din jāḌoñ ke haiñ khiḌkī khulī hai, dhuup andar aa rahī hai

ajab hai ye zabāñ, urdu

kabhī kahīñ safar karte agar koī musāfir sher paḌh de 'mīr', 'ġhālib' kā

vo chāhe ajnabī ho, yahī lagtā hai vo mere vatan kā hai

baḌī shā.ista lahje meñ kisī se urdu sun kar

kyā nahīñ lagtā ki ek tahzīb kī āvāz hai, urdu

ye kaisa ishq hai urdu zaban ka,

maza ghulta hai lafzon ka zaban par

ki jaise pan mein mahnga qimam ghulta hai

ye kaisa ishq hai urdu zaban ka

nasha aata hai urdu bolne mein

gilauri ki tarah hain munh lagi sab istelahen

lutf deti hai, halaq chhuti hai urdu to, halaq se jaise mai ka ghonT utarta hai

baDi aristocracy hai zaban mein

faqiri mein nawabi ka maza deti hai urdu

agarche mani kam hote hai urdu mein

alfaz ki ifraat hoti hai

magar phir bhi, buland aawaz paDhiye to bahut hi mo'tabar lagti hain baaten

kahin kuchh dur se kanon mein paDti hai agar urdu

to lagta hai ki din jaDon ke hain khiDki khuli hai, dhup andar aa rahi hai

ajab hai ye zaban, urdu

kabhi kahin safar karte agar koi musafir sher paDh de 'mir', 'ghaalib' ka

wo chahe ajnabi ho, yahi lagta hai wo mere watan ka hai

baDi shaista lahje mein kisi se urdu sun kar

kya nahin lagta ki ek tahzib ki aawaz hai, urdu